Bıyl 11 myńnan astam elordalyq búldirshin alǵash ret mektep tabaldyryǵyn attaıdy
ASTANA. 27 tamyz. QazAqparat - Jańa oqý jyly bastalyp, mektep tabaldyryǵyn attaýǵa sanaýly kún qaldy. Oqýshylar kitap, dápterin túgendep, alǵashqy qońyraýǵa daıyndyqtaryn pysyqtap jatyr. Al elordalyq bilim oshaqtary tamyz aıynyń 5-i men 25-i aralyǵynda tolyq tekserýden ótip, bilim maýsymyn bastaýǵa daıyn, dep habarlady Astana qalasynyń resmı saıty.
«1 qyrkúıek ár januıada, ár adamnyń júreginde qalatyn úlken mereke. Barlyǵymyz da mektep tabaldyryǵynan óttik. Sondyqtan bul kún balalar úshin ǵana emes, ata-analar úshin de úlken baqyt, qýanysh. Bıyl Bilim kúninde patrıottyq taqyrypqa arnaıy sabaq ótkizemiz», - dedi Astana qalalyq bilim basqarmasynyń basshysy Ásıma Bımendına.
Mundaı merekelik shara elordanyń 70 mektebinde ótedi. Sonymen qatar, «Batyǵaı» turǵyn úı kesheninde jańa №71 mektep-lıtseı 1 qyrkúıekten óz jumysyn bastaıdy. Aıta ketý kerek, bıyl Astanada 86 000 oqýshy mektepke barady. Onyń 11 000-nan astamy 1-synyp búldirshinderi.
«Taǵy bir qýanyshty jaıtpen bóliseıin. Pedagogıka salasynda jas mamandar kóbeıip keledi. 20 tamyzda ótken Tamyz pedagogıkalyq keńesinde 180 jas mamandy qabyldadyq. Olar jańa maýsymnan ustazdyq joldy bastaıdy. Barlyq daıyndyq jumystary atqaryldy. Barlyq mektep jóndeýden ótip, balalardy qabyldaýǵa daıyn. 9 mektepte kúrdeli jóndeý jumystary júrgizildi», - dedi ol.
Eske salaıyq, 1 qyrkúıek jeksenbige tuspa-tus kelgenimen, alǵashqy qońyraý barlyq mektepte soǵylady.
