Bıyl 11 myń shaqyrymnan astam avtojol jóndeý jumystarymen qamtylady

ASTANA. QazAqparat – Bıyl 4 myń shaqyrym jergilikti joldarda jóndeý júrgiziledi. Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov málim etti, dep habarlaıdy QazAqparat tilshisi.

«Bıyl qurylys-montajdaý jumystary jalpy paıdalanymdaǵy 11 myń shaqyrymnan astam avtojolda júrgiziledi. Respýblıkalyq jeli boıynsha 3,6 myń shaqyrymda qurylys jáne rekonstrýktsııa jumystary jalǵasady, sonyń 856 shaqyrymyn aıaqtaımyz. Kúrdeli jáne ortasha jóndeýmen 3,4 myń shaqyrym jol qamtylady», - dedi A. Bekov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, bıyl jergilikti avtojol jelisinde jóndeýdiń barlyq túrlerimen 4 myń shaqyrym jol qamtylmaq, sonyń 3 myń shaqyrymy paıdalanýǵa beriledi.

«Jyl qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 92 paıyzǵa jáne jergilikti jeli boıynsha 87 paıyzǵa deıin jetkiziledi», - dedi Amangeldi Bekov.

Budan buryn habarlanǵandaı, 2022 jyly normatıvtik jaǵdaıdaǵy joldardyń úlesi respýblıkalyq jeli boıynsha 91 paıyzǵa deıin, al jergilikti jeli boıynsha 85 paıyzǵa deıin jetti.