Bıyl 1003 aýyl mektebi jańǵyrtylady

NUR-SULTAN. QazAqparat – Bıyl 1003 aýyl mektebi jańǵyrtylady. Úkimet otyrysynda QR Bilim jáne ǵylym mınıstri Ashat Aımaǵambetov osylaı dep málim etti, dep habarlaıdy QazAqparat tilshisi.

«560 mektepke kúrdeli jáne keshendi aǵymdaǵy jóndeýden ótedi. 2068 pándik kabınet satyp alynyp, 598 mektepte jıhaz jańartylady. 862 kitaphana jańǵyrtýdan ótip, keminde 2 mln kórkem jáne tanymdyq balalar ádebıeti satyp alynady. 574 ashana jańǵyrtylyp, 554 mektepte qaýipsizdik jaǵdaılary jaqsartylady», - dedi Ashat Aımaǵambetov.

Sondaı-aq, ol zańnamalyq deńgeıde oqýshylar saraılaryn, mýzyka jáne kórkemóner mektepterin jekeshelendirýge jol bergizbeý normalaryn engizý boıynsha jumys júrip jatqanyn aıtty.

«Balalardy úıirmeler men kýrstarmen neǵurlym kóbirek qamtý úshin alǵash ret bıyl qosymsha bilim berýge memlekettik tapsyrys ornalastyrý mehanızmi iske asyrylady.

Sondaı-aq, alǵash ret erekshe balaqaılardy arnaıy psıhologııalyq-pedagogıkalyq qoldaý úshin memlekettik tapsyrys engiziletin bolady.

50 myń balaǵa 1 psıhologııalyq medıtsına-pedagogıkalyq komıssııa (PMPK) jańa normatıvin engizý boıynsha jumysty bastadyq. Osyǵan sáıkes 2022 jyly erekshe balalar úshin – 17 jańa PMPK ashylýy tıis», - degen mınıstr bıyldan bastap halyqaralyq zııatkerlik olımpıadalardyń jeńimpazdaryna konkýrsqa qatyspaı joǵary oqý oryndarynyń granttary beriletinin aıtty. Al olardyń ustazdaryna arnaıy syıaqy berilmek.