Bıyl 10 sý qoımasy qalpyna keltiriledi – Maǵzum Myrzaǵalıev

NUR-SULTAN. QazAqparat – Bıyl elimizde 10 sý qoımasy qalpyna keltiriledi. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Búgingi kúni 41 apatty sý qoımasyn qalpyna keltirý boıynsha jumys jalǵasýda. Onyń 11-i qalpyna keltirildi. Sonyń nátıjesinde 14 myńnan astam turǵyny bar 15 eldi mekende sý basý qaýpi joıyldy. Bıyl taǵy 10 sý qoımasyn qalpyna keltirý josparlanýda. Qalǵan 20 sý qoımasyna qatysty jumystar aldaǵy 3 jyldyń ishinde aıaqtalady. Búginde osy nysandar sý jınaǵysh retinde emes, sý ótkizgish retinde qoldanylyp otyrǵandyqtan, sý tasqyny kezinde qaýip tóndirmeıtindigin atap ótkim keledi», - dedi ol.

Jalpy, onyń dereginshe, aldyn ala boljam boıynsha, bıyl ózenderdiń sýlylyǵy qalypty deńgeıde ne odan tómen dep kútilýde.

«Respýblıkalyq menshik nysandaryndaǵy sý sharýashylyǵynyń jaǵdaıy mınıstrliktiń turaqty baqylaýynda. Bul rette, kommýnaldyq menshiktegi gıdrotehnıkalyq qurylystardyń jaı-kúıine oblys ákimderiniń nazaryn aýdarý qajet dep sanaımyz», - dedi Maǵzum Myrzaǵalıev.