Bıyl 1 mıllıonnan astam adam jumyspen qamtylady
Birjan Nurymbetovtiń málimetinshe, elimizdegi barlyq memlekettik baǵdarlamanyń áleýetin eskere otyryp, bıyl 1 mln 220 myń adamdy jumyspen qamtý sharalaryna tartý josparlanǵan. Búginge deıin 743 myń adam sol sharalarǵa tartylǵan.
«Onyń ishinde «Eńbek» baǵdarlamasyna 379 myń adam qatysýǵa nıet bildirdi. Olarǵa shaǵyn kásipkerlikpen aınalysýǵa 5 myń 800 jeńildetilgen nesıe jáne 17 myń 200 qaıtarymsyz tegin grant berildi. Memleket tarapynan jalaqysy sýbsıdııalanatyn jumys oryndaryna 156 myń adam tartylǵan», - dedi mınıstr.
Qysqa merzimdi oqytýmen kásipkerliktiń negizderine oqytýǵa 34,5 myń adam qatysýda. Qyrkúıek aıynda qosymsha 20 myńnan astam UBT-dan ótpegen mektep túlegi jumysshy mamandyqtar boıynsha «tegin tehnıkalyq kásiptik oqýǵa» jiberiletin bolady.
Jumyspen qamtý ortalyqtary ashyq vakansııalarǵa bergen joldamalary boıynsha, 130 myń adamǵa jumys taýyp berdi.
«Eńbek» baǵdarlamasynyń aımaqtardaǵy júzege asýy
5 myń 800 shaǵyn nesıe alǵan azamat qosymsha 6 151 turaqty jumys ornyn ashty.
Shaǵyn nesıeleý jumystarynda Shyǵys Qazaqstan, Qostanaı oblystary jáne Shymkent qalasy jaqsy kórsetkishterge ıe. Al Batys Qazaqstan oblysynda belsendilik tanytý qajet. 17 myńnan astam berilgen granttyń 51 paıyzy az qamtylǵan, kópbalaly januıadaǵy jumyssyzdarǵa baǵyttaldy.
Bul baǵytta Jambyl oblysy jyldyq josparǵa qol jetkizýge jaqyndady, al Qaraǵandy, Soltústik Qazaqstan oblystary men Shymkent qalasynda 80 paıyzdan astam oryndalýda.
Mınıstrdiń sózinshe, Qyzylorda oblysynda granttar berý qarqyny áli tómendeý.
Jalaqysy memleket tarapynan sýbsıdııalanatyn jumys oryndaryn (áleýmettik jumys orny, jastar praktıkasy jáne qoǵamdyq jumystar) qurý jáne oǵan jumyssyzdardy, jas túlekterdi tartý sharalary jalpy jaqsy deńgeıge iske asýda.
«Jumyspen qamtý jol kartasy» boıynsha qandaı jobalar iske asyp jatyr
«Jumyspen qamtý jol kartasy» boıynsha 6 myń 400 júzdeı joba iske asyrylýda. Tamyz aıyn qosa 552 mlrd teńge qarjylandyryldy, búginge onyń 71,5 paıyzy ıgerilip otyr.
Jobalarda 154 myń adam jumys istep jatyr:
- 73 paıyzy - aýyldy eldi mekenderde
- 37 paıyzy - jumyssyz júrgen jastar
- 17 paıyzy – keshegi beıresmı jumyspen aınalysyp júrgen azamattar
- 9 paıyzy – az qamtylǵan otbasy músheleri
Qurylys, jáne jóndeý jumystarynda 90 paıyzdan kem emes ulttyq kásiporyndarynyń tartylý talaby saqtalyp otyr.
«Qazirgi jaǵdaıǵa baǵa beretin bolsaq, jumysqa tartylǵan 154 myń adamǵa 75 mlrd-qa jýyq qarajat eńbekaqy maqsattaryna jumsaldy, otbasy múshelerimen qosqanda 600 myńnan astam adamǵa tabys kózi qamtamasyz etildi», - dedi mınıstr.
Ortasha jalaqy - 130 myń teńge. Jobalarǵa qatysqan bıznes sýbektileri 370 mlrd teńgege tapsyrys aldy jáne ákimdermen birlese baǵalaý boıynsha 19 myńǵa jýyq orta-shaǵyn bıznes ókili merdiger, qurylys materıaldaryn satýshy retinde qatysyp, keminde 114 myńy óz jumys oryndaryn saqtap qalýǵa múmkindik aldy.
Óńirlerge qatysty aqparattyq júıe negizinde monıtorıng boıynsha Shyǵys Qazaqstan, Qyzylorda oblystary men Shymkent qalasynda josparlanǵan jumys oryndaryna halyqty tartýda joǵary kórsetkishterge ıe. Óz kezeginde, Túrkistan jáne Almaty oblystarynda josparlanǵan jumys oryndaryn ashýmen halyqty tartý boıynsha jumysty belsendi etý qajet.
«Jol kartasyn» qarjylandyrýdyń tamyz aıyndaǵy jospary boıynsha, ótken aptada 240 mlrd teńge bólindi.
«Jumyspen qamtý jol kartasynyń» áleýmettik-ekonomıkalyq jaǵdaıǵa áseri
Jańadan soǵylatyn 683 nysan bolashaqta óńirlerde áleýmettik aktıv retinde halyqqa qyzmet etetin bolady.
Onyń ishinde bilim berý salasyndaǵy jańa 80 qurylys – apattyq, úsh-maýsymdy mektep, aýylda bilim alýǵa qoljetimdilik máselelerin sheshýmen birge, pedagogtarymyzǵa 10 myń jańa turaqty jumys ornyn ashýǵa múmkindik bermek.
Densaýlyq, mádenıet, sport, týrızm salasyndaǵy jańa 60 qurylys jobasy 20 myń turaqty jumys ornyn qurady.
153 sý sharýashylyq nysan qurylysy men jańǵyrtýy – sýarmaly, jaıylym jerler kólemin edáýir arttyryp, aýyl sharýashylyǵynda 77 myń turaqty jumys oryndaryn bermek.
400 jýyq kommýnaldyq sharýashalyq nysany, 8 myń km-den astam kalalyq, aýyldyq joldar, 900 eldi mekendi abattandyrý – ákimderdiń halyqpen kezdesý kezinde turǵyndardyń kótergen máselelerin sheshýge jáne halyqtyn ómir súrý sapasyn arttyrýǵa baǵyttalǵan.
Jol kartasy qarajatyn paıdalana otyryp, koronovırýs indetimen kúresý baǵytynda 13 jańa ınfektsııalyq emhana qurylysy júrgiziletin bolady. Óz kezeginde, qosymsha 5 myń turaqty jumys orny ashylmaq.
Jalpy, Jol kartasynyń jobalary 100 myńnan astam turaqty jumys ornyn qurýǵa múmkindik bermek.
Ekonomıkada jańa jumys oryndarynyń qurylýy
Jyl basynda ákimdermen jasalǵan memorandýmdar boıynsha óńirlerde bıyl 431,5 myń jumys orny qurylýy tıis.
Resmı vedomstvolyq statıstıka boıynsha, 7 aıda 300 207 jumys orny qurylǵan:
- 149 myńy – turaqty jumys orny
- 135 myńy - aýylda
Soltústik - Qazaqstan jáne Mańǵystaý, Qyzylorda oblystarda turaqty jumys ornynyń úlesi 70 paıyzǵa artsa, Aqmola, Batys Qazaqstan jáne Qaraǵandy oblystarynda kerisinshe ýaqytsha jumys oryndarynyń úlesi basym.
Halyqtyń Elektrondy eńbek bırjasyn qatysýy artýda
Mınıstrdiń málimetinshe, sońǵy aılarda halyqtyń Elektrondy eńbek bırjasyn qatysý, paıdalaný qarqyny artyp otyr.
Jyl basymen salystyrǵanda jumys berýshiler tarapynan usynǵan vakansııalar sany 8,5 esege ósip, óz kezeginde jumys izdep óz túıindemelerin jarııalaǵan adamdar sany 8 esege artqan.
Nátıjesinde 7 aıda, 333 myń adam EEB arqyly ózine jumys taýyp otyr, onyń 57 paıyzy turaqty jumys oryndaryna ornalasqan.
«Azamattar jumys izdeý maqsatynda jumyspen qamtý ortalyqtaryna da belsendi júginýde. Orta eseppen aıyna 60 myń adam júginedi. Memlekettik baǵdarlamalarǵa qatysý úshin resmı jumyssyz retinde tirkelgenderdiń sany jyl basynan beri 8 ese artqan, óz kezeginde jumysqa ornalastyrý kórsetkishi 11 ese ósti», - dedi Birjan Nurymbetov.
Qosymsha resmı jumyssyz 50 myń 200 adam Memlekettik áleýmettik saqtandyrý qorynan jumyssyzdyǵyna baılanysty arnaıy tólem alýda. Olarǵa 7 aıda 5,5 mlrd teńge tólendi.
Budan bólek aıta ketý kerek, koronavırýsqa qatysty shekteýler saldarynan tabyssyz qalǵan azamattarǵa áleýmettik saqtandyrý qorynan eń tómengi jalaqy kóleminde:
- tótenshe jaǵdaı kezinde 4,6 mln adamǵa 322 mlrd teńge tólendi
- sońǵy qatańdatqan karantın shekteýleri kezinde 2,3 mln adamǵa – 147 mlrd teńge tólendi.
