Bııazy jún ónimderiniń klasterlik bastamasyn iske asyrý kerek - senator

NUR-SULTAN. QazAqparat – Parlament Senatynyń jalpy otyrysynda depýtat Ǵumar Dúısembaev bııazy júndi qoı túrlerin ósirýdi yntalandyrý kerektigin aıtty. Osy oraıda ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat.

«Respýblıkada jyl saıyn 38 myń tonna qoı júni óndiriledi, olardyń ishinde 7,0 myń tonnasy bııazy (19,2%), 4,4 myń tonnasy jartylaı bııazy (12%) jáne 20,6 myń tonnasy (54%) qylshyqty jún. Qazaqstanda negizinen jartylaı qylshyqty jáne qylshyqty jún óndiriledi. Bııazy jáne jartylaı bııazy júndi ımporttaýǵa týra keledi. Máselen, 2018 jyly ımport kólemi 296 tonnany qurady, bul 2017 jylǵy deńgeımen salystyrǵanda 43 paıyzǵa joǵary. Memleket tarapynan toqyma ónerkásibine qajet bııazy jún alynatyn jartylaı bııazy jáne bııazy júndi qoı túrlerin ósirýge yntalandyrý joq», - dep toqtaldy Ǵ. Dúısembaev.

Onyń paıymynsha, bizde qazir zamanaýı túrlengen óndiris bar, olar osyndaı sheteldik ozyq kásiporyndarmen básekege túse alady. Ókinishke qaraı, olar óz óndiristiń qýattylyǵynyń 40-50 paıyzyna ǵana iske asyryp jatyr.

«Júndi alǵashqy qaıta óńdeý satysyndaǵy óndiristi damytý jáne jún ónimderin daıyndaý úshin Bııazy jún ónimderin óndirý jónindegi klasterlik bastamany iske asyrý josparyn ázirleý kerek. Ol úshin, satyp alýǵa tehnıkalyq erekshelikterdi ázirleý kezinde QR ST talaptarynyń saqtalýyn qamtamasyz etý, kvazımemlekettik sektordyń satyp alýyna qol jetkizý arqyly eldiń ishinde kepildendirilgen uzaq merzimdi tapsyrystarmen qamtamasyz etý, memlekettik qorǵanystyq tapsyrystardy qolmen rejımdeý, kórsetilgen tutynýshylarǵa qajetti ónimder bolmaǵan jaǵdaıda tehnologııalardy jınaqtaý, assortımentin keńeıtý jáne ımportqa táýeldilikti azaıtý maqsatynda uzaq merzimdi offteık kelisim-sharttardy jasaýdy usynamyn. Osy jún ónimderin óndirý men óńdeý óndirisi kútilgen qajetti deńgeıge jetkizý úshin joǵarydaǵy suraqtar sheshilýi qajet dep sanaımyn», - dedi senator.