Bıtkoınnyń baǵamy tuńǵysh ret 19 myń dollardan asty
ASTANA. QazAqparat - Senbi kúni bıtkoınnyń baǵamy kezekti ret ósimin kórsetip, 19 myń dollardan asyp jyǵyldy. Buǵan Coindesk elektrondy krıptovalıýtalyq bırjanyń málimetteri kýá, dep habarlaıdy TASS agenttigi .
Bıtkoın - ortalyqsyzdandyrylǵan vırtýaldy valıýta. Tranzaktsııasy shıfrlenetin jáne qoldaný aıasy anonımdi túrde bolǵandyqtan bıtkoındy vırtýaldy «krıptovalıýta» dep te ataıdy. Bıtkoın tólemderiniń jelisi tolyqtaı derlik ortalyqsyzdandyrylǵandyqtan qadaǵalaýshysy bolmaıdy. Júıeniń qyzmeti men qorǵanysyn qamtamasyz etý úshin krıptografııalyq ádister qoldanylady.
Bıtkoındy tólem quraly retinde paıdalaný arqyly taýar satyp alýǵa, telefon baılanysy, ne hostıng aqysyn tóleýge jáne taǵy basqa tólemder jasaýǵa bolady. Open source negizindegi ashyq kod túrinde bolǵanymen anonımdi, ári senimdi tólem júıesi retinde tanymal Bıtkoınderdi saqtaý, qabyldaý jáne jiberý úshin jarııa ıdentıfıkator (mekenjaı), qajetti balans pen jasyryn kiltsózden turatyn ámııan qajet. Aýdarym jasaý úshin qabyldaýshynyń ıdentıfıkatory ǵana suralady. Identıfıkator kúrdeli mándi sandar men áripter jıyntyǵynan turady. Mysaly: 19noTg4T9TeFpT4ZTASvQxf7a1LYLSJa38.
Bıtkoındy 2009 jyly Satoshı Nakomoto oılap tapty. Ol adam týraly aqparat óte az. Bıtkoınnyń negizgi tehnologııasy - maınıng. Júıedegi tutynýshylardyń tranzaktsııalaryn verıfıkatsııalaıtyn protokol. Osy qyzmetti oryndaıtyndardy maınerler dep ataıdy. Tehnologııa jumysy altyn óndirýge uqsaıdy.
