Bıtkoınnyń baǵasy 113 000 dollardan tómen quldyrady

ASTANA. KAZINFORM — 20 tamyz tańynda krıptovalıýta naryǵynda túzetý úrdisi jalǵasty. Bıtkoın baǵasy bir sátte 112 566 dollarǵa deıin tómendedi, al Ethereum – 4060 dollarǵa deıin quldyrady, dep jazdy AZƏRTAC.

AZƏRTAC agenttigi TradingView platformasyna silteme jasaı otyryp habarlaǵandaı, keıinirek bıtkoın baǵasy 113 608 dollarǵa deıin qalpyna keldi. Aptalyq grafıkte quldyraý deńgeıi 5,4%. Al Ethereum 4182 dollarǵa deıin ósti, biraq onyń aptalyq tómendeýi shamamen 9%.

CryptoRank portalynyń derekteri boıynsha, bul túzetý aýqymdy sıpatqa ıe. Degenmen keıbir altkoındar, mysaly Solana jáne TRON, azdaǵan ósim kórsetti.

Naryqtaǵy jaǵdaı:

• Táýliktik lıkvıdatsııalar kólemi — 451 mln dollardan asady;

• Bul negizinen bıtkoın jáne Ethereum-ǵa qatysty uzyn pozıtsııalar;

• 127 000-nan astam treıder májbúrli túrde pozıtsııalaryn japqan.

Osynyń aıasynda qorqynysh pen ashkózdik ındeksi (treıderlerdiń kóńil-kúıiniń ındıkatory) sońǵy 24 saǵat ishinde 11 pýnktke tómendep, «qyzǵylt-sary» aımaqqa jetti. Mundaı tómen mán sońǵy ret 2025 jyldyń maýsymynyń sońynda tirkelgen.

Santiment sarapshylarynyń aıtýynsha, sońǵy táýlikte krıptonaryqqa qatysty «aıý» kóńil-kúıi (ıaǵnı, quldyraý kútimi) áleýmettik jelilerde eń joǵary deńgeıge jetken. Degenmen, uıym ókilderi bul kezeńniń tarıhı turǵyda shydamdy treıderler úshin tıimdi bolatynyn atap ótti — olar qorqynysh pen dúrbeleńdi portfeldi tolyqtyrý múmkindigi retinde paıdalanady.

Túzetýdiń sebepteri

18 tamyzdan keıingi krıptonaryqtaǵy bul túzetý birqatar faktorlarmen baılanysty, deıdi naryq sarapshylary.

— Bul quldyraý bıtkoınnyń tarıhı maksımýmdy jańartqannan keıingi paıda fıksatsııasy men pozıtsııalar lıkvıdatsııasyna baılanysty boldy. Qazir treıderler kútý rejımine ótti, al naryq aıqyn saıasat belgileri paıda bolǵansha konsolıdatsııa satysynda bolýy múmkin, - deıdi Kronos Research kompanııasynyń tehnıkalyq dırektory Vınsent Vang The Block basylymyna bergen pikirinde.

Al Presto Research zertteý bóliminiń basshysy Pıter Chýng kelesi mańyzdy oqıǵa retinde AQSh Federaldyq rezerv júıesiniń tóraǵasy Djerom Paýelldiń 22 tamyzda Djekson-Hoýldegi sóz sóıleýin atap ótti. Onyń aıtýynsha, osy málimdeme naryqtyń baǵytyna áser etýi múmkin.

Al Qazaqstan qarjygerler qaýymdastyǵy Nasdaq pozıtsııasyn joǵaltyp jatqanyn, al oǵan tehnologııalyq sektordaǵy paıda fıksatsııasy sebep bolǵanyn málim etken edi.