Bıtkoın baǵasy 8 myń dollarǵa jetti
NUR-SULTAN. QazAqparat - Bıtkoın baǵasy 8 myń dollarǵa jetip, byltyrǵy jyldyń shilde aıynan keıin eń úlken kórsetkishke kóterildi, dep jazady CNN basylymy.
«Baǵa kóterilgen soń sarapshylar bul jaǵdaı bıtkoınnyń ınvestıtsııalyq múmkindik retinde bolashaǵy baryn kórsetetinin jarysa aıta bastady. Degenmen, ózgeris jıi bolyp turatyn valıýtaǵa áli senimsizdik baıqalady», - dep jazady basylym.
Krıptoaktıvterdi basqarý máselelerimen aınalysatyn Interchange kompanııasynyń negizin qalaýshy Den Heldtiń aıtýynsha, valıýta baǵasynyń qaıta kóterilýi bıtkoındy qatersiz ınvestıtsııa retinde kórsetken. «Dál osy sátte adamdardyń bılik pen bank júıesinen kóńili qalǵan bolýy múmkin», - deıdi ol.
«Keı sarapshylardyń aıtýynsha, bıtkoın baǵasynyń ósýine dúısenbi kúni ınvestorlardyń bıtkoın saýdasyna aralasýy áser etken bolýy múmkin. Al naryq baǵasy odan da kóp adamdy tartqan», - delingen aqparatta.
Osy aptadaǵy bıtkoın baǵasynyń ósýin keıbir mamandar blokcheın aptasymen baılanystyrady. Bul bıtkoınnyń resmı emes merekesi sanalady. Kanadanyń Coinsquare atty krıptovalıýta satý platformasynyń dırektory Lenno Svıtıngtiń aıtýynsha, Consensus 2019 dep atalatyn blokcheın aptasyna arnalǵan shara bıtkoın men basqa da krıptovalıýta satyp alýshylardyń nazaryn aýdara bilgen. Sondaı-aq JPMorgan Chase (JPM) pen Microsoft (MSFT) kompanııasy jaqynda blokcheın platformasyna qatysty ortaq joba bastaıtynyn málimdegen bolatyn. Bul da bıtkoın baǵasynyń ósýine áser etýi múmkin.
Aıta ketý kerek, 2017 jyly jeltoqsan aıynda bıtkoın baǵasy 20 myń dollarǵa jetken edi.
