Bıtkoın baǵasy tarıhı rekord jańartyp, $120 myńnan asty

ASTANA. KAZINFORM — Binance platformasyndaǵy málimetke sáıkes, bıtkoın baǵasy jańa tarıhı maksımýmdy jańartyp, $120 000 sheginen asty, dep habarlaıdy TASS.

Máskeý ýaqytymen 06:41–de krıptovalıýta $120 myńǵa jetip (+1,87%), al 06:45–te ósimin jalǵastyryp, $121 014,73 deńgeıine deıin kóterildi (+2,82%).

9 shildede bıtkoın baǵasy $100–$110 myń aralyǵynda bir jarym aı boıy turaqtaǵannan keıin, $111 999 deńgeıine jetip, aldyńǵy rekordty jańartqan edi. Buǵan deıingi tarıhı maksımým 2025 jyldyń 22 mamyrynda, bıtkoın $111 980 bolǵan kezde tirkelgen.

Bıtkoın — blokcheın tehnologııasyna negizdelgen ortalyqtandyrylmaǵan krıptovalıýta júıesi. Bul júıede árbir qatysýshy jańa bloktar jasaý arqyly bıtkoın óndire alady. Júıeni alǵash ret 2008 jyldyń qarashasynda Satosı Nakamoto degen laqap atpen belgili avtor (ne avtorlar toby) usynǵan.

Búginde bıtkoın tanymaldyǵy artqanymen, onyń emıssııasy tabıǵı túrde shekteýli, jáne qazirgi tańda bıtkoındardyń basym bóligi óndirilip qoıǵan.

Buǵan deıin 11 shildede bıtkoın baǵasy óziniń tarıhı maksımýmyn jańartyp, $113 myńnan asqanyn jazǵanbyz.