Bıtkoın quny quldyrap barady
ASTANA. KAZINFORM – Álemdegi eń iri krıptovalıýta – bıtkoınnyń baǵasy 12%-ǵa arzandady. Qazir onyń bir monetasy – 64 000 dollar, ıaǵnı 2024 jyldyń qazan aıyndaǵy deńgeıine túsken. Bul jóninde NBC News habarlady.
CoinMarketCap dereginshe, bıtkoın 2025 jyldyń 6 qazanynda monetasyna 125 000 dollarǵa baǵalanǵan. Demek, sol kezdegimen salystyrsaq, qazir 1,2 trln dollardan astam qunyn joǵaltqan. Buǵan ınvestorlardyń senimsiz valıýta – krıptovalıýta men tehnologııalyq kompanııalardyń aktsııalarynan bas tartýy sebep bolyp otyr. Olar qarjysyn altyn tárizdi dástúrli aktıvter túrinde saqtaýǵa kóshken.
Bıtkoınnyń baǵasy 2025 jyldyń aqpan aıymen salystyrǵanda 35%-ǵa túsken. Al altynnyń quny, kerisinshe, 70%-ǵa ósken.
Bıyl alǵashqy birer aıdyń ózinde altyn 11%-ǵa qymbattasa, al bıtkoın 26%-ǵa arzandady.
Eń iri bıtkoın saqtaýshy kompanııa Strategy-diń aktsııalary 17%-ǵa quldyrady. Óıtkeni, atalǵan uıym qarjysyn jyldar boıy bıtkoın túrinde jınap kelgen. Endi qazir 713 000 monetasy bar. Árqaısysy 76 000 dollarǵa baǵalanady.
Sondaı-aq bıtkoınniń arzandaýy saldarynan AQSh-taǵy eń iri krıptovalıýtalyq bırja – Coinbase-diń aktsııalary arzandaǵan. Circle qarjylyq kompanııasy men Robinhood saýda platformasy da dál osyndaı zııanǵa ushyrady.
Eske salsaq, buǵan deıin de bıtkoın baǵasynyń úzdiksiz quldyrap bara jatqanyn jazǵanbyz.
Alpamys FAIZOLLA
