Bıtkoın AQSh-tyń ósip kele jatqan memlekettik qaryzyn azaıtýy múmkin — senator
ASTANA. KAZINFORM — AQSh álemdegi barlyq bıtkoınniń 5 paıyzdan astamyna ıelik etse, memlekettik qaryzyn edáýir qysqartýy múmkin. Bul týraly AQSh senatory málimdedi, dep habarlaıdy Kazinform agenttiginiń Vashıngtondaǵy menshikti tilshisi Crypto News basylymyna silteme jasap.
Vaıomıng shtatynan saılanǵan respýblıkashyl senator Sıntııa Lammıs AQSh barlyq bıtkoınniń shamamen 5 paıyzyna teń kólemdi (1 mıllıon BTC shamasynda) satyp alyp, ony 20 jyl boıy saqtasa, teorııalyq turǵydan qazirgi 39 trıllıon dollardan asatyn memlekettik qaryzdy aıtarlyqtaı azaıtyp, tipti úshten birine nemese jartysyna deıin qysqartýǵa múmkindik bar ekenin aıtty.
Lammıs buǵan deıin de qosymsha bıýdjet shyǵyndarynsyz bes jyl ishinde 1 mıllıon BTC satyp alýdy kózdeıtin zań jobasyn qoldap keledi.
Alaıda bul bastamaǵa qarsy pikir aıtýshylar da az emes. Sarapshylar bıtkoın baǵasynyń óte qubylmaly ekenin, onyń quny kúrt tómendep ketýi múmkin ekenin alǵa tartady. Sonymen qatar, krıptovalıýta satyp alý úshin altyn qorlaryn jappaı satý memlekettik rezervterge degen senimdi álsiretýi yqtımal ekenin eskertedi.
Arkham analıtıkalyq kompanııasynyń derekterine sáıkes, AQSh úkimetiniń ıeliginde 328 352 bıtkoın bar. Onyń jalpy quny shamamen 20,29 mıllıard dollardy quraıdy. Bul aktıvterdiń basym bóligi qylmystyq jáne azamattyq ister aıasynda tárkilengen qarajat esebinen alynǵan.
Qazirgi ýaqytta bıtkoın baǵasy 61 586 dollarǵa deıin tómendegen. Bul 2025 jylǵy qazanda tirkelgen 126 198 dollarlyq tarıhı rekordtyq kórsetkishten shamamen 52 paıyzǵa tómen.
Buǵan deıin bıtkoın qunynyń quldyraýy jedeldep jatqany habarlanǵan bolatyn.
