Bitik shyqqan bıylǵy astyqty saqtaý boıynsha qaýipter tym ásirelengen - B.Qabdyrahmanov
ASTANA. 20 jeltoqsan. QazAqparat /Gúlmıra Alıakparova/ - Bitik shyqqan bıylǵy astyqty saqtaý boıynsha qaýipter tym ásirelengen.
Qazaqstanda 13,5 mln. tonna astyqty saqtaýǵa arnalǵan lıtsenzııalanǵan 223 astyq qabyldaý kásiporny (ASK) bar. Sondaı-aq, 8,9 mln. tonna bıdaıǵa eseptelgen lıtsenzııalanbaǵan ASK-lar jumys isteıdi. Bul aqparatty «Azyq-túlik kelisim-shart korporatsııasy» UK» AQ-nyń basqarma tóraǵasy Beıbithan Qabdyrahmanovtyń sózine silteme jasap, kompanııanyń baspasóz qyzmeti taratty.
Táýelsizdik jyldary ishinde alǵash jınalǵan rekordty - 29 mln. tonna astyqty aman-esen saqtap qalý múmkindikteri týraly áńgimeler kóp qozǵalýda. Azyq-túlik kelisim-shart korporatsııasy basshylyǵynyń aıtýynsha, bıyl óz ýaqytynda qolǵa alynǵan sharalar, bul máselege qatysty túıitkilderdi der ýaqytynda sheshýge múmkindik berdi.
«Aǵymdaǵy jyldyń jazynda-aq biz úkimetke usynyspen shyqtyq, 22 tamyzda astyq egetin óńirlerdegi elevatorlardy jańa eginge bosatý úshin, 500 myń tonna astyqty ózge aımaqtardaǵy elevatorlarǵa aýystyrý týraly sheshim qabyldandy», - dep atap ótti B.Qabdyrahmanov.
Solaısha, Batys Qazaqstan oblysynyń elevatorlaryna - 203,3 myń tonna, Aqtóbege - 166,4 myń tonna, Shyǵys Qazaqstan oblysyna - 203,3 myń tonna, Mańǵystaý oblysyna - 43,7 myń jáne Qaraǵandy oblysynyń elevatorlaryna - 26,8 myń tonna astyq bólinip, aýystyryldy. Astyq Aqmola (133,7 myń tonna), Qostanaı (179,9 myń tonna) jáne Soltústik Qazaqstan oblystarynan (186,6 myń tonna) shyǵaryldy.
«Bıylǵy astyqty saqtaý boıynsha qaýipter birshama ásirelengen. Qazaqstanda 13,5 mln. tonna astyqty saqtaýǵa arnalǵan lıtsenzııalanǵan barlyǵy 223 astyq qabyldaý kásiporny (ASK) bar. Sondaı-aq, 8,9 mln. tonna bıdaıǵa eseptelgen lıtsenzııalanbaǵan ASK-lar jumys isteıdi. Onymen birge, qazir kóptegen fermerler ózderiniń sharýashylyqtarynda keptirý-tazartý qurylǵylaryn ornatty, olar astyqty ózderiniń qoımalarynda saqtaýǵa múmkindik beredi. Sondaı-aq, bıdaı eksportqa shyǵarylýda, bul da saqtaý qoımalarynyń bosaýyna septigin tıgizýde», - dedi Basqarma tóraǵasy.
Aıta keteıik, QR Aýyl sharýashylyǵy mınıstrliginiń aldyn ala boljamy boıynsha, 2011 jyly taza salmaqta 22-23 mln. tonna astyqtyń orylýy kútildi. Al eksport 10 mln. tonna shamasynda baǵalandy. Mol shyqqan astyqtyń arqasynda bıyl eldiń eksporttyq áleýeti 15 mln. tonnaǵa deıin artty. Syrtqy saýda aıtarlyqtaı jaqsy bolmaq, sebebi, qazaqstandyq bıdaıdyń álemdik naryqtaǵy básekelestik basymdyǵy - joǵary sapaly kórsetkishter. Onymen qosa, AQSh pen Eýropalyq odaq elderinde aýa raıynyń qolaısyz jaǵdaılaryna baılanysty dándi daqyldardyń ónimi birshama azaıdy, bul jáıt Qazaqstan astyǵynyń eskportyna oń áserin tıgizbeı qoımasy anyq.
