Bıshimbaev isi: Baıjanovtyń ókinishi jazany jeńildete me

ASTANA. KAZINFORM – Eks-mınıstr Qýandyq Bıshimbaevqa taǵylǵan aıyp boıynsha qylmystyq is búgin nesimen este qaldy? Búgin prokýror men advokattar Bıshimbaevty emes, inisi Baqytjan Baıjanovty suraqtyń astyna aldy.

Esterińizge salsaq, Baıjanovqa Bıshimbaevtyń qylmysyn jasyrdy degen aıyp taǵylyp otyr. 

Baıjanov buǵan deıin de Saltanattyń denesi kógergenin birneshe ret kórgenin aıtty. Tipti, keıde erli-zaıyptylardyń úıine shkaf pen esik jóndeıtin adam jiberýge týra kelgen. Qıraǵan zattardy da óz kózimen kórgen. Qaıǵyly oqıǵa bolatyn kúni de janjaldy kezekti urys retinde qabyldap, asa mán bermegen.

«Saltanat qoryldap uıyqtap jatty. Jaman oı kelmedi. Jedel járdem shaqyryp, dabyl qaǵýym kerek edi. Osy sumdyq oqıǵadan qabyrǵasy qaıysyp otyrǵandarǵa shyn júregimmen janym ashıdy. Saltanattyń týǵan-týystaryna kóńil aıtamyn. Maǵan senbeıtin shyǵarsyzdar. Biraq júregim aýyryp, qaıǵyramyn. Sebebi, Saltanatty óte jaqsy qyrynan tanıtynmyn. Men bárinen keshirim suraımyn. Eń birinshi, Saltanattyń týystarynan, dostarynan, ózimniń ata-anamnan, jubaıym men balalarymnan keshirim suraımyn. Men jaýapkershilikti tolyqtaı moınyma alamyn. Sol qaıǵyly kúni jaǵdaıdy tolyq túsinip, baǵamdaı almaǵanym úshin ókinemin», - dedi Baıjanov.

Aıtpaqshy, buǵan deıin Saltanattyń aǵasy Qaırat Núkenov Baıjanovty keshirýge daıyn ekenin aıtqan edi. 

«Ol tek aǵasynyń kesirinen tergelip jatyr. Onyń balalary baryn bilemiz. Áıeli, áke-sheshesi bar. Áke-sheshesimen kezdestik. Óte jaqsy otbasy. Maǵan solaı kórindi. Baıjanov Bıshimbaev sııaqty emes. Ol bárin sonyń yqpalymen istegen. Ol sotta shyn jaýap berse, biz de adambyz ǵoı, keshirýge daıynbyz», - degen edi Qaırat Núkenov.