Bıshimbaevtyń úkimin jeńildetý úshin 100 mln teńge alǵan elorda turǵyny tergelip jatyr

ASTANA. KAZINFORM – Elorda turǵyny Bıshimbaevtyń úkimin jeńildetý syltaýymen aldaý arqyly 100 mln teńgeni jymqyrǵan.

Sybaılas jemqorlyqqa qarsy qyzmet Q.Bıshimbaevtyń týystarynyń ótinishi boıynsha elorda turǵyny «G»-ǵa qatysty sotqa deıingi tergeý júrgizip jatyr.

Agenttik málimetinshe, ol asa iri mólsherde alaıaqtyqqa oqtalǵany, ıaǵnı Q.Bıshimbaevtyń úkimin jeńildetý syltaýymen aldaý arqyly 100 mln teńgeni ıemdený boıynsha kúdikti. Sonymen qatar kúdiktiniń is-áreketi asa iri mólsherde para berýge ıtermeleý boıynsha saralandy. Onyń qylmystyq áreketiniń basqa epızodtary tekserilip jatyr.

Kúdikti sottyń sanktsııasymen qamaýǵa alyndy. Tergeý jalǵasyp jatyr.

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

«Sybaılas jemqorlyqqa qarsy qyzmet memlekettik organdardyń qyzmetine baılanysty qandaı da bir máselelerdi sheshý syltaýymen alaıaqtyqtyń, onyń ishinde para berýge ıtermeleýmen ushtasqan alaıaqtyqtyń jalǵasyp jatqan jaǵdaılaryna nazar aýdarady», - delingen habarlamada.