Bıshimbaevtyń taǵdyryn sheshetin suraqtar: alqabıler keńesip jatyr

ASTANA. KAZINFORM – Astana qalasynyń qylmystyq ister jónindegi mamandandyrylǵan aýdanaralyq sotynda aıyptalýshylar Qýandyq Bıshimbaev pen Baqytjan Baıjanovqa qatysty ótip jatqan sot protsesinde sýdıa Aıjan Qulbaeva alqabılerge qoıylatyn suraqty oqyp berdi. Jaýap negizinde úkim shyǵarylmaq.

Suraqtar jarııa etilgennen keıin 10 alqabı úkimdi shyǵarý úshin keńesý bólmesine ketti. Sýdıa úkimniń jarııalaný ýaqyty keıinirek belgili bolatynyn aıtty.

Aıta keteıik, buǵan deıin Qýandyq Bıshimbaev pen Baqytjan Baıjanov sońǵy sózin aıtqan bolatyn. Alǵashqysy buǵan deıin alǵa tartqan faktilerdi taǵy bir márte eske salyp, Saltanat Núkenovany qatygezdikpen óltirmegenin jetkizdi.

Baıjanov bolsa, Saltanattyń ólimin jasyrý bylaı tursyn, ólim aýzynda jatqanyn bilmegenin alǵa tartqan bolatyn.

Sonymen, alqabılerge qoıylatyn suraqtar tómendegideı:

1. 2022 jyldyń 16 jeltoqsanynan 2023 jyldyń 9 qarashasyna deıin, 2023 jyldyń naýryzynda, sáýirinde jáne jazda Almaty, Astana qalalarynda Núkenovaǵa fızıkalyq kúsh qoldanylyp, denesiniń jáne basynyń ár jerin birneshe ret urǵany jáne onyń ar-ojdanyna moraldyq azap kórsetilgeni dáleldendi me?

2. Bul isterdi Bıshimbaev istegeni dáleldendi me?

3. Bıshimbaev osy isti istegeni úshin kináli me?

4. Jábirlenýshi Núkenova Bıshimbaevpen birge turǵaly jumys isteýin toqtatyp, tabyssyz qalǵany jáne materıaldyq turǵyda táýeldi bolyp qalǵany dáleldendi me?

5. Qylmystyq kodekstiń 99-baby, 2-bóligi, 5-tarmaǵy boıynsha aıyp boıynsha birinshi suraq: Qylmys bolǵan kúni, atap aıtqanda 2023 jyldyń 9 qarashasynda, shamamen tústen keıin jábirlenýshi alǵan jaraqattarynan qaıtys bolǵany dáleldendi me?

6. Sıpattalǵan jaǵdaılarda jábirlenýshiniń qasaqana jáne qasaqana maqsatty túrde birneshe ret uryp-soǵý arqyly alǵan jaraqattary ólimine sebep bolǵany dáleldendi me?

7. Sottalýshy jábirlenýshiniń ómirine qasaqana aıaýsyz fızıkalyq jáne moraldyq azaptaýǵa, aýyr jáne uzaqqa sozylǵan azapqa ushyratyp, kóp mólsherde dene jaraqattaryn keltirip, oǵan sý bermeı, qorlaǵany dáleldendi me?

8. Birinshi suraqta sıpattalǵan jaǵdaılarda jábirlenýshiniń densaýlyǵyna aýyr zııan keltirgen, jábirlenýshiniń abaısyzda ólimine ákep soqtyrǵan basyna kóptegen soqqy jasalǵany, bul áreketti sottalýshy jasaǵany dáleldengen be?

Esterińizge salsaq, aıyptalýshy Bıshimbaev buǵan deıin de Saltanattyń óliminde óz kinám bar ekenin moıyndap, uryp-soqqanyn jasyrmaǵan.