Bıshimbaevtyń isi boıynsha sot tergeýleri aıaqtaldy
ASTANA. KAZINFORM – Sýdıa Aıjan Qulbaeva Saltanat Núkenovanyń ólimine qatysty sot tergeýiniń aıaqtalǵanyn habarlady. Taraptarǵa jaryssózge daıyndalýǵa ýaqyt berildi.
Sodan keıin sottalýshylar – Qýandyq Bıshimbaev pen Baqytjan Baıjanovqa qatysty úkim jarııalanady. Jaryssóz 29 sáýirde bastalady.
Búgingi sot otyrysy sońynda sýdıa aıyptalýshynyń pozıtsııasyn naqtylaý maqsatynda suraq qoıdy.
Bıshimbaev áıeline jasalǵan soqqylar onyń ólimine ákelgenin moıyndap, alaıda «asa qatigezdikpen adam óltirý» jáne «azaptaý» baptary boıynsha kinásin moıyndamaıtynyn aıtty.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bıshimbaevtyń isi boıynsha alqabılerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.
Al, 16 sáýirde Qýandyq Bıshimbaevtiń isi boıynsha sot otyrysy ýaqytsha toqtatyldy.
