Bıshimbaevtyń inisi bostandyqqa erte shyǵýy múmkin be — mınıstr jaýaby

ASTANA. KAZINFORM — Kesheli beri BAQ-ta sottalǵan eks-mınıstr Qýandyq Bıshimbaevtyń isti bolǵan týys inisi Baqytjan Baıjanov merziminen buryn bostandyqqa shyǵýy múmkin degen aqparat tarap jatyr. 

Atalǵan máselege qatysty Іshki ister mınıstri Erjan Sadenovtiń pikirin bilgen edik.

— Shartty túrde merziminen buryn bosatý týraly sheshimdi sot qabyldaıdy. Aldymen ótinish túsedi, ol sotqa joldanyp, sońǵy sheshimdi sot shyǵarady. Qýandyq Bıshimbevtiń inisine qatysty, ázirge naqty is kelip túsken joq. Eger ol erte bosatýǵa ótinish bildirse, ony sot qaraıdy, — dep jaýap berdi Erjan Sadenov Májilis qabyrǵasynda BAQ ókilderiniń saýalyna jaýap bere turyp.

Eske salaıyq, eks-sheneýnik Qýandyq Bıshimbaev azamattyq nekede bolǵan áıelin óltirgeni úshin 24 jylǵa sottaldy. Al týys inisi Baqytjan Baıjanov 4 jylǵa bas bostandyǵynan aıyryldy. 

Aıta ketsek, Bas prokýrordyń orynbasary Áset Shyndalıev Qýandyq Bıshimbaevtyń raqymshylyqqa iliný múmkindigi týraly pikir bildirgen edi.