Bıshimbaevtyń merziminen buryn bosap shyǵýyna kimderdiń kelisimi kerek
ASTANA. KAZINFORM — Ádilet vıtse-mınıstri Botagóz Jaqselekova eks-mınıstr Qýandyq Bıshimbaevtyń merzimenen buryn bosap shyǵýy múmkindigine qatysty suraqqa jaýap berdi.
«Merziminen buryn bosatý máseleleri zańmen rettelgen jáne jasalǵan qylmys dárejesine baılanysty. Jalpy, bul máseleni qylmys jasaǵan adam qamalǵan mekemeniń usynysy boıynsha sot sheshedi», - dedi B. Jaqselekova Senatta ótken baspasóz máslıhatynda.
Bul turǵyda tilshiler vıtse-mınıstrden isti bolǵan Bıshimbaevta merziminen buryn bostandyqqa shyǵýǵa qanshalyqty múmkindigi bar ekenin surady.
«Meniń bilýimshe, sot sheshimi áli zańdy kúshine engen joq. Sheshim kúshine engen soń, qylmystyń aýyrlyq dárejesin eskere otyryp, tıisti esepteýler júrgizilip, qosymsha túsiniktemeler beriledi dep oılaımyn», - dep túsindirdi Botagóz Jaqselekova.
Sondaı-aq oǵan «Bıshimbaevtyń merziminen buryn bosatylýyna zardap shekken otbasy músheleri kelisim berýi kerek pe?» degen suraq qoıyldy.
«Shartty túrde merziminen buryn bosatý kezinde mundaı múmkindik bar. Bul múmkindik jazany ótep jatqan adamdy oń sıpattaıtyn mán-jaılar bolǵan kezde belgilenedi. Aýyr qylmystar úshin eń tómengi merzim sottalǵan ýaqyttyń úshten ekisin ótegennen keıin qarastyrylýy múmkin. Rasynda da bul jaǵdaıda jábirlengen taraptyń kelisimi qajet. Biraq bul máselede sot sheshimine basymdyq beriletinin atap ótkim keledi. Ekinshiden, osy naqty úkim zańdy kúshine engenin kútýimiz kerek», - dedi Botagóz Jaqselekova.
Aıta keteıik, sýdıa Aıjan Qulbaeva Qýandyq Bıshimbaev pen Baqytjan Baıjanovqa qatysty Alqabılerdiń úkimin oqydy.
Qylmystyq kodekstiń 110-baby 2-bóligi 1-tarmaǵynda, 99-bóliginiń 1-tarmaǵynda kózdelgen qylmystyq quqyq buzýshylyqtardy jasaǵany úshin kináli dep tanylyp, QK-niń 110-babynyń 2-bóliginiń 1-tarmaǵymen 7 jylǵa bas bostandyǵynan aıyryldy. Qylmystyq kodekstiń 99-babynyń 2-bóliginiń 5-tarmaǵy boıynsha – 20 jylǵa bas bostandyǵynan aıyryldy. Qylmystyq kodekstiń 58-babynyń 4-bóligine sáıkes, qylmystardyń jıyntyǵy boıynsha jazalardy ishinara qosý arqyly Bıshimbaev 24 jylǵa bas bostandyǵynan aıyryldy.
Sonymen qatar, Alqabıler Baqytjan Baıjanovty aǵasy Qýandyq Bıshimbaevtyń qylmysyn jasyrǵany úshin kináli dep tapty. Sóıtip sot Baıjanovty 4 jylǵa bas bostandyǵynan aıyrdy.
