Bıshimbaevtyń anasy 1 mln dollarǵa jýyq aqshany qaıdan alǵanyn túsindirdi
ASTANA. KAZINFORM — Astanada Bekzat Kemelova isi boıynsha ótip jatqan sotta burynǵy mınıstr Qýandyq Bıshimbaevtyń anasy, is boıynsha jábirlenýshi dep tanylǵan Almıra Nurlybekova sóz sóıledi.
A. Nurlybekova óz týysy B. Kemelova ıemdenip aldy degen 990 myń dollardyń shyǵý tegin túsindirdi.
Prokýror otbasynyń mundaı qarajatty qaıdan alǵanyn surady. A. Nurlybekovanyń aıtýynsha, ol kóp jyldan beri kásipkerlikpen aınalysyp keledi. 1993 jyldan bastap bıznes júrgizip, keıin jeke kásipker retinde Qyzylordada taýar jetkizýmen aınalysqan. Keıinirek Tarazda mektep pen SPA-salon ashqan, odan soń ǵımarattardyń birin jáne eki qabatty úıin satqan.
Osydan keıin ol Shymkentke kóship, bıznesin jalǵastyrǵan. Túlekterdi oqytyp, konsaltıng kompanııasyn jáne stomatologııaǵa arnalǵan preparat óndiretin kásiporyn ashqan.
A. Nurlybekovanyń aıtýynsha, bul qarajat zańdy jolmen tabylǵan, al tabystyń zańdylyǵyn 2017 jyly Sybaılas jemqorlyqqa qarsy qyzmettiń tekserisi rastaǵan.
Sot barysynda B. Kemelova A. Nurlybekovadan «advokatqa aqshany qaıdan aldyńyz?» dep surady. Q. Bıshimbaevtyń anasy 30 jyldan beri bıznes júrgizip kele jatqanyn, otbasynyń árdaıym óz qarajaty bolǵanyn aıtty.
A. Nurlybekova B. Kemelovany 15 jyldan astam ýaqyttan beri tanıtynyn, ol kúıeýiniń nemere aǵasynyń áıeli ekenin, arada senimdi qarym-qatynas qalyptasqanyn aıtty.
Onyń sózinshe, B. Kemelova tintý júrgizilýi múmkin dep eskertken. Aqshasyn joǵaltyp alýdan qaýiptengen A. Nurlybekova oǵan shamamen bir mıllıon dollar bergen.
2023 jyldyń 10 jeltoqsanynda ol qyzy ekeýi aqsha salynǵan shabadandy Bekzat Kemelovaǵa tapsyrǵan.
Sot otyrysy jalǵasyp jatyr.
Buǵan deıin Qýandyq Bıshimbaevtyń anasy týysymen sottasyp jatqanyn habarlaǵan edik. Materıaldarǵa súıensek, Almıra Nurlybekova óziniń týysy Bekzat Kemelovany 990 myń AQSh dollaryn (aıyptaý aktisine sáıkes 453 mln 182 myń 400 teńge) ıemdendi dep aıyptap otyr.