Bıshimbaevqa úkim shyǵararda sot 20 zań buzýshylyqqa jol berdi – Qorǵaýshy

ASTANA. KAZINFORM – Elordalyq sotta Qýandyq Bıshimbaev pen Baqytjan Baıjanov isi boıynsha apellıatsııalyq sotynyń birinshi otyrysy bastaldy. Sotta birinshi bolyp Q.Bıshimbaevtyń advokaty Erlan Ǵazymjanov sóz sóıledi.

Qorǵaýshy Bıshimbaevqa shyǵarylǵan úkimmen kelispeıtinin málimdedi.

«Men ony zańsyz dep sanaımyn jáne Qylmystyq kodekstiń «Abaısyzda ólimge ákep soqtyrǵan densaýlyqqa aýyr zııan keltirý» boıynsha 106-babyna aýystyrylyp, jaza azaıtylýy qajet. Al «Azaptaý» baby boıynsha úkimniń kúshi joıylyp, is qaıta qaraýǵa jiberilýi kerek», - dedi E.Ǵazymjanov.

Onyń aıtýynsha, úkimdi ózgertýge jáne joıýǵa bolady. Óıtkeni qorǵaýshy birinshi satydaǵy sot jasaǵan 20 buzýshylyqty anyqtap, apellıatsııada kórsetken. Advokat alqabıler alqasyn qurý kezinde sottyń keıbir kandıdattarǵa qarsylyq bildirýin birinshi aýyr quqyqbuzýshylyq dep atady.

«Sýdıa óz erkimen sheshim qabyldap, qaısysynyń sottalýshymen jasty balalary bar ekenin anyqtaı bastady jáne 20 úmitkerdiń ishinen tórteýin shyǵaryp tastady. Shyǵarylǵan úsh úmitkerdiń uldary bar edi. Osylaısha, sýdıa alqabıler alqasyn qurý tártibin buzbaǵanda jáne zań boıynsha áreket etkende, osy 4 úmitkerdiń ishinen bireý negizgi quramǵa kirip, daýys berer edi. Úkim basqasha bolýy múmkin edi», - dedi E.Ǵazymjanov.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.

Qýandyq Bıshimbaev 24 jylǵa sottaldy.

Bıshimbaevtyń úkimin jeńildetý úshin 100 mln teńge alǵan elorda turǵyny tergelip jatqanyn eske sala keteıik.

Sondaı-aq, eks-sheneýniktiń merziminen buryn bosap shyǵýy múmkin be, degen taqyrypta sholý jasaǵan edik.