Bıshimbaev soty: S.Núkenovanyń aǵasy marqumnyń beti kógergen sýretin kórsetti
ASTANA. KAZINFORM – Eks-mınıstr Qýandyq Bıshimbaevtyń búgingi soty otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip jatyr.
Aıtbek Amangeldi sot kezinde Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıta kelip, marqumnyń bet-álpeti kógergen sýret kórsetti. Jábirlenýshi tarap bul sýret Bıshimbaevtyń Núkenovany sabaǵanyna dálel bolady dep esepteıtinin de jetkizdi.
«Meniń jeke pikirim boıynsha, bul sýret betten kóp ret judyryqpen urǵanyna kýá bola alady. Árıne, men Saltanat úshin qorqyp kettim, jaǵdaıyna alańdadym. Ol maǵan sýretterin jiberip, bir nárseler jazdy. Birinshi áreketim oǵan qońyraý shalý boldy. Men qońyraý shalǵan kezde túngi saǵat bir kezi bolatyn. Ol tutqany kótermedi. Alańdaı bastadym da, Qýandyqqa telefon soqtym. Qýandyq jaýap berdi. Qýandyqtan ne bolyp jatqanyn, nege ondaı sýret alyp jatqanymdy suradym. Meniń tarapymnan beıádep sózder de aıtyldy. Ol úıge kel, sóıleseıik dep jaýap berdi. Úıdiń aldynda kezdesip, bárin talqylaıyq dedi. Kelgende Qýandyq bolmaı shyqty. Úıge kirip, besinshi qabatqa kóterilip, esik qaqtym. Esikti basqa nekeden týǵan qyzy Ranııa ashty. Ranııa meni jaqsy tanıtyn, Saltanat qaıda ekenin surap edim, kórmegenin aıtty. Úıge kirip búkil bólmeni aralap shyqtym. Ol kezde páterde Ranııadan basqa eshkim bolǵan joq», - dep eske aldy Aıtbek Amangeldi.
Aıtbek Amangeldi osydan keıin Qýandyq Bıshimbaevpen tóbelesip qalǵanyn aıtty. Osy jaǵdaıdan keıin S. Núkenovany alyp ketpek bolǵanymen, marqum ketýden bas tartqanyn atap ótti.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bıshimbaevtyń isi boıynsha alqabılerdi irikteý ótti.
