Bıshimbaev isin júrgizgen sýdıany qorqytqandarǵa is qozǵaldy
ASTANA. KAZINFORM — Joǵarǵy sot Bıshimbaev pen Baıjanovtyń isin júrgizgen sýdıa Aıjan Qulbaevaǵa belgisiz nómirden qońyraýlar men qorqytý habarlamalary túskenin málimdedi.
Astana qalasynyń polıtsııa departamenti sýdıa A.Qulbaevaǵa qatysty qorqytý faktisi boıynsha qylmystyq is qozǵady.
Qylmystyq kodekstiń 407-babynyń 1-bóligi (sot tóreligin júzege asyrýǵa kedergi jasaý maqsatynda sottyń qyzmetine aralasý) boıynsha sotqa deıingi tergeý bastaldy.
Qazirgi ýaqytta sýdıa jeke qaýipsizdik sharalarymen qamtamasyz etildi.
Sonymen qatar, ınternet keńistiginde júrgizilgen monıtorıng barysynda sýdıaǵa qatysty qylmys áreketteri bar kóptegen jaǵymsyz jarııalanymdar anyqtaldy.
Tekserý nátıjesi boıynsha tergeý organy Qylmystyq kodekstiń 411-babynyń 1-bóligi (sýdıaǵa jala jabý) boıynsha qylmystyq is qozǵady.
«Zań kez kelgen adamǵa sot tóreligin júzege asyrý protsesine, onyń ishinde sýdıanyń atyna jala jabý nemese qorqytý sıpatyndaǵy materıaldardy jarııalaý jolymen yqpal etýge tyıym salatynyn eskertemiz. Sot bıliginiń bedelin túsiretin áreketterdiń joly kesiledi» dep habarlady Joǵarǵy sot.
