Bıshimbaev isi: onlaın-kórsetilim reıtıngi keıbir serıaldardan asyp tústi
ASTANA. KAZINFORM – Joǵarǵy Sottyń Kommýnıkatsııa bóliminiń meńgerýshisi Perızat Sádýaqas Q.Bıshimbaevqa qatysty sot protsesine qoǵamnyń joǵary qyzyǵýshylyǵyn atap ótti.
Sol sebepten de is boıynsha ashyq sot otyrystarynyń onlaın-translıatsııasyn uıymdastyrý týraly sheshim qabyldanǵan.
«Osy rette, Joǵarǵy Sot basshylyǵynyń sot protsesterin ashyq jáne jarııa túrde ótkizýge, sol arqyly qoǵamdyq baqylaýdy kúsheıtýge nıetti ekenin atap ótkim keledi. Az ýaqyt ishinde materıaldyq-tehnıkalyq jabdyqtarymen, barlyq nıet bildirgen BAQ-tyń sot protsesine kedergisiz, kidirissiz qatysýy qamtamasyz etildi.
Bıylǵy 27 naýryzdan bastap 9 sot protsesi boıynsha 17 tikeleı efır ótkizildi. Jalpy, tikeleı efırdiń retranslıatsııasyna, protsesske BAQ-tyń qatysýyna eshqandaı kedergi, shekteý bolǵan joq», — dedi ol.
Perızat Sádýaqastyń málimetinshe, qazir Joǵarǵy Sottyń tikeleı efırin translıatsııalaǵan TengriNews ınternet-resýrsynyń akkaýnttarynda onlaın-translıatsııanyń júktelgen jazbasyn kórý qaralymy 20 mln-tan asqan.
«Bizdiń YouTube arnamyzdaǵy jazbany kórý qaralymy 1,5 mln-nan asty. Bul, meniń oıymsha, rezonansty iske qatysty qoǵamnyń joǵary qyzyǵýshylyǵynyń kórsetkishi. Onlaın-translıatsııany kórý aýmaǵy ulǵaıýda. Qazirgi tańda bizdiń efırlerdi AQSh, Ulybrıtanııa, Germanııa, Birikken Arab Ámirlikteri, Túrkııa, Ońtústik Koreıa, Reseı, Grýzııa, Moldova, Belarýs, Ýkraına, Ózbekstan, Qyrǵyzstan sekildi memleketter kórýde. Joǵarǵy Sotqa osy sot protsesin óz elderinde onlaın taratýǵa ruqsat berý týraly sheteldik BAQ-tan usynystar túsýde. Dál qazir bul máseleni talqylap jatyrmyz», — dedi Joǵarǵy Sot ókili.
Tikeleı efırge 250 myń kórermenniń bir mezgilde qosylýy boıynsha rekord tirkeldi. 25-44 jas aralyǵyndaǵy kórermender jalpy kórermen sanynyń 58%-yn qurap otyr.
«Sondaı-aq, biz júrgizgen taldaýǵa sáıkes tikeleı efır kórermenderiniń 75%-y qyz-kelinshekter. Bul — onlaın sot protsesiniń qoǵamda quqyqtyq mádenıetti qalyptastyrýǵa jáne quqyqtyq saýattylyqty arttyrýǵa yqpaly bolady dep úmittenemiz», — delingen jazbada.
