Bıshimbaev isi: Máskeýde jasalǵan saraptama isten alynyp tastaldy

ASTANA. KAZINFORM — Astana qalasynyń qylmystyq ister jónindegi mamandandyrylǵan aýdanaralyq sotynda Saltanat Núkenovany asa qatigezdikpen óltirdi dep aıyptalǵan eks-mınıstr Qýandyq Bıshimbaevtyń soty jalǵasyp jatyr.

Búgin sýdıa Aıjan Qulbaeva Qýandyq Bıshimbaevtyń advokattary jasatqan sot medıtsınalyq saraptamany sot qaýlysymen isten alyp tastady. 

Sýdıanyń aıtýynsha, saraptama jasaý jóninde sotqa ýaqtyly habar berilmegen. Sáıkesinshe, saraptama zań buza otyryp jasalǵan.

Eske sala keteıik, 16 sáýir kúngi sotta Bıshimbaevtyń qorǵaýshylary óz bastamasymen Máskeýde jeke sot medıtsınalyq saraptama jasatqanyn málimdegen bolatyn. 

Prokýror Aıjan Aımaǵanova ony isten alyp tastaý kerek ekenin alǵa tartyp, sýdıaǵa ótinish joldady.

Prokýrordyń aıtýynsha, quzyrly organdar jeke saraptama jasalyp jatqanyn habarsyz bolǵan. 

Sondaı-aq, saraptama jasaǵan RF azamattaryn eshqandaı jaýapkershilikke tartý múmkin emes.

Bul rette olar jalǵan saraptama jasaýy múmkin degen kúmán bar.

Aıta keteıik, reseılik sarapshylar Saltanat Núkenovanyń ólimi 3-4 apta buryn paıda bolǵan jaraqattan bolýy múmkin degen qorytyndy jasaǵan edi.

Al bul — qazaqstandyq sarapshylardyń tujyrymdamasyna qaıshy.