Bıshimbaev isi: Kóripkelden jaýap alyndy
ASTANA. KAZINFORM – Eks-mınıstr Qýandyq Bıshimbaevqa qatysty sot protsesinde búgin kóripkel kýáger retinde saýaldarǵa jaýap berdi. Sotqa onlaın formatta qatysqan ol jan-jaqtan qysym kórsetilip jatqanyn alǵa tartyp, BAQ qatysýynsyz jaýap berýge ótinish bildirdi.Prokýrorlar bul ótinishti qanaǵattandyrýdy surady. Alaıda, jábirlenýshiler qoldaǵan joq. Taraptardyń usynysyn saraptaǵan sýdıa Aıjan Qulbaeva kýágerdiń bet-álpetin túsirmeı jáne jeke derektersiz jaýap alý týraly sheshim qabyldady.
Kóripkel Bıshimbaevty anasy arqyly tanıtyn bolyp shyqty. Shamamen 1,5-2 jyl buryn tanysqan. Qýandyq Bıshimbaev ara-tura habarlasyp turatyn kórinedi.
9 qarasha kúni Bıshimbaev qońyraý shalǵan kezde kóripkel «nege jedel járdem shaqyrmaısyń?» dep aıtqanyn alǵa tartyp otyr.
«Ol maǵan qońyraý shaldy. «Men ne isteı alam, jedel járdem shaqyr, dárigerge kórset» dedim. Ol maǵan qaıta-qaıta qońyraý shala berdi. Aqyry, jaýap bermeı qoıdym. Ol jaza bastady. «Onyń qaly jaqsy dep jazyńyzshy» dep qoımaı qoıdy», - dedi ol.
Kóripkeldiń aıtýynsha, saǵat 19:30-da ol Bıshimbaevtyń anasy Almıraǵa telefon soqqan.
«Sizdiń ulyńyz birdeńe búldirdi. Olar qatty tóbelesip qaldy, baryp bilińiz. Onda qorqynyshty nárse boldy. Ol qatty jylaı bastaǵan soń men tutqany qoıa saldym», - dedi kóripkel.
Ekinshi aıyptalýshy Baqytjan Baıjanov kóripkel ótirik aıtyp turǵanyn jetkizdi. Ol kóripkeldiń «jedel járdemge qońyraý shal dep aıttym» degen sózin joqqa shyǵaryp otyr.
«Men bul jerde bárin tyńdap otyrmyn. Birinshi ret qońyraýdy saǵat ekide shalǵan. Ol kezde men bolǵan emespin. Saǵat 15.51 kezinde qońyraý shalǵan kezde men Bıshimbaevtyń janynda boldym, bárin estidim. Onyń jaýaby maǵan kómektese me, joq pa, bilmeımin, biraq ol shyndyqty aıtyp turǵan joq. Ol «dárigerdi, jedel járdemdi shaqyr» demedi. Men Bıshimbaevtyń janynda turǵanmyn. Bárin estip turdym. Ol «onyń mıy sharshaǵan, uıyqtap alsyn, birazdan keıin oıanady, sodan keıin úıge qaıtasyńdar» dedi», - dep Baıjanov estigenin aıtyp berdi.
Eske sala ketsek, bıyl 27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bıshimbaevtyń isi boıynsha alqa bılerdi irikteý ótti. Alqa bılerdi foto, vıdeoǵa túsirýge jáne jarııalaýǵa tyıym salynǵan.
Buǵan deıin habarlaǵanymyzdaı, Qýandyq Bıshimbaevtyń isi boıynsha onlaın-kórsetilim reıtıngi keıbir serıaldardan asyp tústi. Joǵarǵy Sottyń Kommýnıkatsııa bóliminiń meńgerýshisi Perızat Sádýaqastyń aıtýynsha Q.Bıshimbaevqa qatysty sot protsesine qoǵam joǵary qyzyǵýshylyq tanytyp otyr. Tikeleı efırge 250 myń kórermenniń bir mezgilde qosylýy boıynsha rekord tirkeldi. 25-44 jas aralyǵyndaǵy kórermender jalpy kórermen sanynyń 58%-yn qurap otyr.
