Bıshimbaev isi: Ekinshi kúdikti Baıjanov shyndyq detektorynan ótkisi keledi

ASTANA. KAZINFORM – Burynǵy mınıstr, áıelin óltirdi dep aıyptalǵan Qýandyq Bıshimbaevtyń týys inisi, ekinshi kúdikti Baqytjan Baıjanov sotta sóz sóıledi.

«Meni Bıshimbaevpen birge Saltanattyń denesin shyǵarýdy josparlady dep aıyptap otyr. Jábirlenýshi taraptyń paıymdaýynsha, buǵan kúni boıy daıyndalǵan ekenbiz. Men muny jasaǵan joqpyn. Aldymda tutas qarańǵy tún tursa da, meıramhanada eshkim joq, qolaıly sát bolsa da, mundaı qadamǵa barmadym. Óıtkeni ondaı oı mende múldem bolǵan joq. Saltanattyń qaıtys bolǵanyn da bilmedim», - dedi B. Baıjanov búgingi sot otyrysynda.

B. Baıjanov jeıde men músátir spırtin ózi alyp ketti degen nusqaǵa nelikten bári senimdi ekenine qaıran qalyp otyr.

«Bul zattar ǵımarattan tabylmaǵan soń aıyptaýdyń bir boljamy retinde shyqty. Bálkim durys izdemegen shyǵar? Oqıǵa ornyn tórt ret – bir ret Bıshimbaevtyń kóligin, úsh ret sol VIP-kabınany tekserdi. Al meıramhanadaǵy basqa oryndar, as úı nemese basqa bólmeler esh tekserilmegen. Múmkin jeıde men músátir spırti áli ǵımaratta shyǵar, nege men ony alyp shyǵýym kerek? Eger rasynda da vıdeolardy óshirip, qylmystyń izin jasyrǵym kelse, bárin ózim atqarar edim. Men ony basqalarǵa tapsyrdym. Shynymen dálelderdi joıýǵa tyryssam, derekterdi saqtaıtyn serverdi joıa alar edim jáne jazbalar eshqashan qalpyna kelmes edi. Biraq olaı istegenim joq. Men bárin búkpesiz aıtyp berdim, eshteńeni jasyrmadym, tek shyndyqty aıttym. Qajet bolsa jáne múmkin bolsa, shyndyq detektorynan da ótýge ázirmin. Qalǵany sizderdiń qolyńyzda, kez kelgen sheshimdi qabyldaımyn», - dedi B. Baıjanov.