Bıshimbaev isi: Búgingi sot nesimen este qaldy
ASTANA. KAZINFORM – Eks-mınıstr Qýandyq Bıshimbaevtyń sotynda kún saıyn tyń derekter jarııalanyp keledi. Qos taraptyń qorǵaýshylary biliktiligin tanytyp, ár sózdi, ár sekýndty taldap jatyr.
Búgin Bıshimbaevtyń advokaty Erlan Ǵazymjanov «ádetine basyp», sýdıa Aıjan Qulbaevaǵa «sot birjaqty ótip jatyr» dep baıbalam saldy. Tipti, ádiletsiz sot isin júrgizip jatyrsyz dep sotqa qarsy shyqty.
«Men sizdiń áreketterińizge qarsylyq bildirýge májbúrmin, óıtkeni siz protsesti birjaqty júrgizip jatyrsyz. Siz memlekettik aıyptaýdyń kishigirim ótinishterine deıin qanaǵattandyrasyz. Al bizdiń dáleldi ótinishterimizden bas tartasyz. Men sizdiń áreketterińizge qarsylyq bildirýge májbúrmin, - dedi Ǵazymjanov.
Sýdıa advokatqa jónsiz aıyp taqqany úshin eskertý jasady.
Budan keıin sotta Saltanat Núkenovanyń qurbysy Aıda Ahmedına tóbe kórsetip, saýaldarǵa jaýap berdi. Sondaı-aq, marqum qurbysymen jazysqan hattardy oqyp berdi. Onda Saltanat Qýandyq Bıshimbaevpen birge tura almaıtynyn, Taılandtan 10 myń dollarǵa psıholog kelip, biraq Bıshimbaevqa em qonbaǵanyn aıtqan.
«Onyń oıy ylǵı sandyraq. Tyńdamasam jyndanyp, aıǵaılaıdy. Shynymdy aıtsam, men ony aıaımyn. Ol jaraly adam. Men oǵan kómekteskim kelgen, biraq men óz-ózimdi óltirip tynatyn shyǵarmyn...», - dep jazǵan Saltanat qurbysyna.
Budan keıin sotta taǵy bir aıyptalýshy Baqytjan Baıjanovtyń uıaly telefonyndaǵy derekter jarııalandy.
Telefonda Saltanat Núkenova kóz jumǵan kúni túsirilgen vıdeo saqtalǵan eken. Baıjanovtyń aıtýynsha, jedel járdem qyzmetkerleri Saltanattyń ólimin tirkep, jarııa qylǵannan keıin Bıshimbaev ózin vıdeoǵa túsirýdi ótinipti.
Prokýror sotta vıdeony kórsetýge shekteý qoıyp, aýdıo dybysty tyńdatty. Vıdeonyń bireýi 9, ekinshisi 12 sekýndqa sozylǵan. Beınejazbalar 2023 jyldyń 9 qarashasynda saǵat 20.17-de túsirilgen.
«Bar dúnıemdi, shottarymdy balalaryma syılaımyn. Nazymǵa syılaımyn. Balalarymdy asyrasynshy. Sonyń 10 paıyzyn men Mansur, Karım, Ranııaǵa syılaımyn. Nazymǵa syılaımyn. Osyny aıtam», - depti Bıshimbaev.
Astana qalasynyń qylmystyq ister jónindegi mamandandyrylǵan aýdanaralyq sotynda ótip jatqan sot protsesi 18 sáýirde saǵat 09.30-de jalǵasady.
