Bıshimbaev isi: Búgingi kýágerler ne dedi

ASTANA. KAZINFORM — Búgin Astana qalasynyń qylmystyq ister jónindegi mamandandyrylǵan aýdanaralyq sotynda eks-mınıstr Qýandyq Bıshimbavqa qatysty sot protsesinde tyń derekter aıtyldy.

Búgin kýágerler kózben kórgenin aıtyp, prokýror men advokattardyń saýaldaryna jaýap berdi.

• Sot-medıtsınalyq sarapshy Tahır Halımnazarov Saltanat Núkenovanyń ólimine sebep bolǵan basty jaraqattardy manekenge syzyp kórsetip, marqumnyń moınynda qylǵyndyrý belgileri bar ekenin aıtty.
• «Bau» meıramhanasynyń ákimshisi Bıshimbaev pen Núkenova arasynda buǵan deıin janjal bolǵanyn aıtyp, tipti jıhazdar synǵanyn málimdedi.
• Saltanat Núkenovanyń qurbysy Aıda Ahmedına olardyń arasyndaǵy qarym-qatynas jaıly az bilmeıtinin alǵa tartty. Onyń aıtýynsha, birde Saltanat habarlasyp, Bıshimbaevtyń uryp-soqqanyn, advokat izdegenin habarlaǵan. Tipti, Qýandyq Bıshimbaev Saltanatty jalańash kúıde vıdeo túsirýge májbúrlegeni de aıtyldy.

Sot protsesi erteń jalǵasady.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty.

Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.

Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.

Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.

1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi.

11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti.

Aldyn ala tyńdaý 12 naýryzda jalǵasty.

27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti.

29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-keris qalaı bastalǵany týraly málimetter aıtty jáne marqumnyń bet-álpeti kógergen sýretti kórsetti.

1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.

Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.

Keshegi sot otyrysynda Qýandyq Bıshimbaev «Saltanattyń óliminde óz kinám bar ekenin moıyndaımyn, uryp-soqqanym ras» dep málimdedi.