Bıshimbaev isi boıynsha sot sheshimi ádil bolatynyna kúmánim joq — Senat tóraǵasy

ASTANA. KAZINFORM — Senat tóraǵasy Máýlen Áshimbaev sotta Qýandyq Bıshimbaevtyń isine qatysty ádil ári obektıvti úkim bolatynyna senimdi ekenin aıtty.

«Meniń oıymsha, biz qarastyryp jatqan turmystaǵy zorlyq-zombylyq úshin jaýapkershilikti kúsheıtý týraly zań qabyldanǵannan keıin, kez kelgen jaǵdaıda qoǵamymyzda eleýli ózgerister bolady. Bizdiń qoǵam qazirdiń ózinde basqasha. Bir jyl burynǵymen salystyrǵanda qazir adamdar otbasyndaǵy zorlyq-zombylyq faktilerin basqasha qabyldaıdy. Problemalar bolǵanda, qazir adamdar úndemeı otyrmaıdy, áıelder shaǵymdaryn aıtyp jatyr. Qazir áıelder óz narazylyqtaryn bildirip, bul týraly ashyq aıtyp, qoǵam olardy qoldap jatyr», — dedi M. Áshimbaev Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, qazir elde barlyǵy Qýandyq Bıshimbaevqa qatysty sottyń obektıvti, ádil jáne zańdy ótýine erekshe nazar aýdaryp otyr.

«Aldaǵy sot sheshimi ádil, obektıvti jáne zańdy bolatynyna kúmánim joq. Osy protsesti júrgizip jatqan Joǵarǵy Sot basshylyǵy, sýdıalar qoǵam men halyq aldyndaǵy jaýapkershiligin túsinedi dep oılaımyn. Osy jaǵdaıda bireýler qandaı da bir manıpýlıatsııaǵa túsedi dep oılamaımyn. Sondyqtan jýrnalıster de jaǵdaıdy sabyrmen qabyldaǵany jón. Qazir barlyǵy da protsestiń obektıvti, ádil jáne zańdy ótýine múddeli», — dedi Senat tóraǵasy.

Aıta keteıik, áıelin óltirdi dep aıyptalǵan Q. Bıshimbaevtyń basty soty 27 naýryzǵa belgilendi. Sot alqabıler qatysýymen ótedi.