Bıshimbaev isi: Baıjanov 4 jylyn abaqtyda ótkizedi

ASTANA. KAZINFORM – Qýandyq Bıshimbaevtyń qylmysyn jasyrdy dep aıyptalǵan eks-mınıstrdiń inisi Baqytjan Baıjanov sot úkimimen 4 jylǵa sottaldy. 

Baıjanov 4 jyl kóp merzim ekenin aıtyp, qarsylyq tanytqanyn atap ótken jón. Sýdıa Aıjan Qulbaeva qaıta bul jeńildetilgen jaza ekenin jetkizdi.

«Sottalýshylardyń kinási dáleldendi. Sot jaza taǵaıyndaý kezinde sottalýshylar Bıshimbaev pen Baıjanovtyń kámeletke tolmaǵan balalaryn eskerip, muny jeńildetetin mán-jaı retinde qarastyrdy», - dedi sýdıa.

 

Ol sot protsesi bastalǵannan beri óziniń kinásiz ekenin aıtyp, marqum Saltanat Núkenovanyń týystarynan birneshe ret keshirim suraǵan bolatyn.

«Saltanat qoryldap uıyqtap jatty. Jaman oı kelmedi. Jedel járdem shaqyryp, dabyl qaǵýym kerek edi. Osy sumdyq oqıǵadan qabyrǵasy qaıysyp otyrǵandarǵa shyn júregimmen janym ashıdy. Saltanattyń týǵan-týystaryna kóńil aıtamyn. Maǵan senbeıtin shyǵarsyzdar. Biraq júregim aýyryp, qaıǵyramyn. Sebebi, Saltanatty óte jaqsy qyrynan tanıtynmyn. Men bárinen keshirim suraımyn. Eń birinshi, Saltanattyń týystarynan, dostarynan, ózimniń ata-anamnan, jubaıym men balalarymnan keshirim suraımyn. Men jaýapkershilikti tolyqtaı moınyma alamyn. Sol qaıǵyly kúni jaǵdaıdy tolyq túsinip, baǵamdaı almaǵanym úshin ókinemin», - degen edi Baıjanov aldyńǵy sot protsesteriniń birinde.

Tipti, Saltanattyń aǵasy Qaırat Núkenov Baıjanovty keshirýge daıyn ekenin aıtqan edi.

«Ol tek aǵasynyń kesirinen tergelip jatyr. Onyń balalary baryn bilemiz. Áıeli, áke-sheshesi bar. Áke-sheshesimen kezdestik. Óte jaqsy otbasy. Maǵan solaı kórindi. Baıjanov Bıshimbaev sııaqty emes. Ol bárin sonyń yqpalymen istegen. Ol sotta shyn jaýap berse, biz de adambyz ǵoı, keshirýge daıynbyz», - degen edi Qaırat Núkenov.

Dese de, keıingi sot protsesinde Baıjanovtyń keıbir sózderi, áreketi bir-birimen qabyspaı, Saltanattyń týystary odan teris buryldy.

Baqytjan Baıjanov sottaǵy sońǵy sózinde Saltanattyń ólimin jasyrý bylaı tursyn, ólim aýzynda jatqanyn bilmegenin alǵa tartty.

«Iá, qyzmetkerlerdi úılerine qaıtaryp, meıramhanany jaýyp, beınejazbalardy óshirýdi buıyrǵanymdy jasyrmaımyn. Biraq men sol kezde aýyr qylmys jasalǵanyn bildim be? Ant etemin. Bilmedim. Eger bilgende qylmysty jasyrý áreketteriniń eshqaısysyn jasamaıtyn edim. Saltanattyń týǵan-týystarynan taǵy da keshirim suraımyn. Jatqan jeri jaıly bolsyn», – degen edi ol.

Esterińizge salsaq, 29 sáýirde prokýror Saıahat Nurbekov aıyptaýshy tarap Baıjanovqa Qylmystyq kodekstiń 434-baby – «qylmys týraly habarlamaý» boıynsha jartylaı aıyp taǵýdan bas tartyp, oǵan qatysty qylmystyq isti qaraýdy jalǵastyrý qajet dep sanaıtynyn aıtqan edi. Sóıtip, Baıjanovqa Qylmystyq kodekstiń 432-babyna sáıkes, asa aýyr qylmysty «jasyrý» boıynsha qylmystyq is qozǵaldy.

Sot protsesteriniń birinde Baıjanov shyndyq detektorynan ótkisi keletinin aıtqan bolatyn.