Bıshimbaev isi: Baqytjan Baıjanov Joǵarǵy sotqa shaǵymdanbaıtyn boldy

ASTANA. KAZINFORM — Marqum Saltanat Núkenovanyń ólimine qatysy bar degen aıyppen sottalǵan Baqytjan Baıjanov úkimniń kúshin joıýdy jáne isti jańa sot talqylaýyna jiberýdi suraǵan edi. Alaıda Joǵarǵy sottyń baspasóz qyzmetiniń málimetinshe, sottalýshy ótinishin qaıtaryp alǵan.

«Baqytjan Baıjanov bıylǵy 26 tamyzda sotty qaıta qaraý týraly óziniń kassatsııalyq ótinishin keri qaıtaryp aldy. Osyǵan baılanysty ótinish aldyn ala qaralmaıdy. Ótinishti qaıtarý týraly qaýly 2024 jylǵy 4 qyrkúıekte shyǵarylady», — delingen Joǵarǵy sottyń habarlamasynda. 

Eske sala keteıik, Qýandyq Bıshimbaevtyń qylmysyn jasyrdy dep aıyptalǵan eks-mınıstrdiń inisi Baqytjan Baıjanov sot úkimimen 4 jylǵa sottaldy.  

Keıin aǵaıyndylar úkimmen kelispeı apellıatsııalyq shaǵym túsirdi.  

Aıta ketsek, apellıatsııa soty eks-sheneýnik Qýandyq Bıshimbaev pen onyń inisi Baqytjan Baıjanov úkimin ózgerissiz qaldyrǵan edi.