Bıshimbaev isi: BAQ ókilderiniń sot zalyna kirýine qaıta ruqsat berildi

ASTANA. KAZINFORM – Elordada ótip jatqan eks-sheneýnik Qýandyq Bıshimbaevtyń isine qatysty sot otyrysyna jýralıster qaıtadan tikeleı qatysa alatyn boldy.

«Alqa bılerdi sot otyrysy zalyna shaqyrmas buryn, tekserý nátıjesinde anyqtalǵandaı olardyń fotolary men vıdeosyn BAQ-ta jarııalaǵan KTK arnasynyń ókilderi ákimshilik jaýapkershilikke tartyldy. Ákimshilik jaza eskertý túrinde qoldanyldy», - dedi sýdıa Aıjan Qulbaeva. 

Sondaı-aq, sýdıa jýrnalısterdi sot zalyna kirgizýge ruqsatty daýysqa saldy, Q. Bıshimbaev pen onyń qorǵaýshylary qarsy shyqty, qalǵan jaq qarsylyq tanytpady. Osylaısha sýdıa 10 mınýtqa úzilis jarııalady. 

«Sot protsesiniń ashyq ótip jatqanyn eskere otyryp, qylmystyq is júrgizý kodeksiniń 29-babynda bekitilgen is júrgizý sotynyń jarııalylyq qaǵıdatyn qamtamasyz etý jáne ádil sot talqylaýy maqsatynda sot buqaralyq aqparat quraldarynyń ókilderin sot zalyna kirýine ruqsat berý qajet dep sanaıdy. Sondaı-aq, KTK arnasy da sot zalyna jol beriledi, óıtkeni buǵan deıin olarǵa qatysty ákimshilik jaýapkershilik qoldanyldy», - deıdi sýdıa. 

Eske sala ketsek, sottyń tyıym salýyna qaramastan, BAQ-ta jáne áleýmettik jelilerde alqa bılerdiń bet-álpeti beınelengen vıdeo paıda bolǵan edi. Sodan keıin sot BAQ ókilderin sot zalyna kirgizbeý týraly sheshim qabyldady. 

Aıta keteıik, aıyptalýshy Qýandyq Bıshimbaev sotqa uıaly telefonynyń parolin berýden bas tartty. Ony tek qorǵaýshylaryna usyna alatynyn aıtqan edi. 

Eske sala ketetin taǵy bir jaıt, Joǵarǵy sot Bıshimbaev pen Baıjanovtyń isin júrgizgen sýdıa Aıjan Qulbaevaǵa belgisiz nómirden qońyraýlar men qorqytý habarlamalary túskenin málimdegen edi. 

Astana qalasynyń polıtsııa departamenti sýdıa A.Qulbaevaǵa qatysty qorqytý faktisi boıynsha qylmystyq is qozǵady.