Bıshimbaev isi: alqabıler alqasyna kandıdattardy irikteıtin jabyq otyrys bastaldy
ASTANA. KAZINFORM – Astana qalasynyń Qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabıler alqasyna kandıdattardy irikteıtin jabyq otyrys bastaldy.
Otyrysta 12 adamnan turatyn (10 negizgi jáne 2 qosalqy) alqabıler alqasy qurylady.
Osyǵan oraı, keshe alqabıler alqasyna iriýkteý tártibi túsindirildi.
«Qazaqstan Respýblıkasynyń soty eń aldymen isterdi zańdylyq, zań men sot aldyndaǵy barlyǵynyń teńdigi, taraptardyń teńdigi jáne ashyqtyq qaǵıdattaryn saqtaýǵa baǵyttalǵanyn atap ótkim keledi.
Ózderińizge málim, Q.Bıshimbaevqa qatysty sot talqylaýyna qoǵamnyń qyzyǵýshylyǵynyń artqanyn eskere otyryp, osy is boıynsha ashyq sot otyrystarynan ashyq onlaın-translıatsııa uıymdastyrý týraly sheshim qabyldandy.
Osylaısha, onlaın-translıatsııa arqyly kez kelgen adam, sonyń ishinde BAQ ókilderi bul sot protsesiniń barysyn baqylaı alady», — dep jazdy Joǵarǵy sottyq baspasóz qyzmeti ókili Perızat Sádýaqas.
Bul sheshim sot talqylaýynyń ashyq ári jarııaly bolǵanyn jáne jalǵasatynyn bildiredi.
Protseske qatysýshylardyń jáne qatysýǵa nıet bildirýshilerdiń kóptigin eskere otyryp, otyrystan onlaın-translıatsııa júrgiziletin qosymsha eki zal uıymdastyryldy.
Eske salaıyq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.
Munan soń Іshki ister mınıstrligi Qýandyq Bıshimbaevtyń ustalǵanyn rastady. Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi. Bıyl 26 aqpanda Qýandyq Bıshimbaevtyń isi sotqa tústi. 1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi.
11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaýdyń 12 naýryzda jalǵasty.
