Bıshimbaev isi: Alqa bıdiń bireýi aýysty
ASTANA. KAZINFORM – Astana qalasynyń qylmystyq ister jónindegi mamandandyrylǵan aýdanaralyq sotynda eks-mınıstr Qýandyq Bıshimbaevqa qatysty sot otyrysy jalǵasyp jatyr. Búgingi sot protsesi bastalmaı turyp alqa bılerdiń bir múshesi aýysty.
Sýdıa Aıjan Qulbaeva alqa bılerdiń bir múshesi densaýlyǵyna baılanysty sot otyrysyna qatysa almaıtynyn málimdedi.
Mundaı jaǵdaıda zań boıynsha onyń ornyn qosalqy alqa bı múshesi almastyrýǵa tıis.
Bul rette qosalqy alqa bı múshesi óz ornyna jaıǵasyp, sot protsesi jalǵasyn tapty.
Bıshimbaevtyń advokattary sot otyrysyna qatysa almaǵan alqa bı múshesiniń densaýlyǵynda kinárat bar ekenin dáleldeıtin qujattardy surady.
Sot hatshysy tıisti qaǵazdardy kórsetti.
Aıta keteıik, sottyń tyıym salýyna qaramastan BAQ-ta jáne áleýmettik jelilerde alqa bılerdiń bet-álpeti beınelengen vıdeo paıda bolǵan edi. Osy rette alqa bılerdi foto-vıdeoǵa túsirýge qatysty tergeý júrgiziledi.
