Bıshimbaev, Másimov jáne Perızat Qaırat raqymshylyqqa ilikpeıdi – ІІM
ASTANA.KAZINFORM – Sottalýshylar – Qýandyq Bıshimbaev, Kárim Másimov jáne Perızat Qaırat merziminen buryn bostandyqqa shyqpaıdy. Bul jóninde Májiliste ótken brıfıngte QR Іshki ister mınıstriniń orynbasary Sanjar Ádilov málimdedi.
Aldymen, Májilistiń jalpy otyrysynda «QR jańa Konstıtýtsııasyn qabyldaýǵa baılanysty raqymshylyq jasaý týraly» zań jobasy qabyldandy. Onda qylmystyq jáne ákimshilik raqymshylyq qarastyrylǵan.
Keıin brıfıngte jýrnalıster Іshki ister mınıstriniń orynbasaryna rezonanstyq ister boıynsha sottalǵan azamattar jóninde saýal qoıdy. Naqtyraq aıtqanda, Qýandyq Bıshimbaev, Kárim Másimov jáne Perızat Qaırat týraly surady.
– Siz ataǵan azamattar raqymshylyqqa ilikpeıdi. Óıtkeni, QR QK 78-baby terrorızm, ekstremızm, memleketke opasyzdyq jasaý, jemqorlyq, qylmystyq toptardyń quramynda bolý boıynsha sottalǵan azamattarǵa amnıstııa jasaýǵa tikeleı tyıym salady. Sondyqtan atalǵan tulǵalardyń raqymshylyqqa ilinýi jóninde másele qozǵalyp jatqan joq jáne qozǵalmaıdy da, – dedi Sanjar Ádilov.
Aıta keteıik, buǵan deıin bıyl 15 myń qylmystyq jazasyn óteýshige raqymshylyq jasalatynyn jazǵanbyz.
https://kaz.inform.kz/news/biilgi-kilmistik-rakimshilik-15-min-adamga-katisti-boladi-m-4403c026/
