Bıshimbaev marqum Saltanat Núkenovanyń otbasyna 17 mln teńge tóleıtin boldy

ASTANA. KAZINFORM – Astana qalasynyń azamattyq ister jónindegi aýdanaralyq soty marqum Saltanat Núkenovanyń aǵasy Aıtbek Amangeldiniń eks-sheneýnik Qýandyq Bıshimbaevtan materıaldyq jáne moraldyq zalaldy óndirý talabyn qarap, sheshim shyǵardy.

Aıtbek Amangeldi talabynda qaıǵyly oqıǵa saldarynan moraldyq azap shekkenin, densaýlyǵynyń nasharlaǵanyn jáne eńbekke qabilettiligin joǵaltqanyn aıtqan. 

«Sot parasattylyq pen ádildik qaǵıdattaryn negizge alyp, jaqyn týysynyń qaıtys bolýy sózsiz talap qoıýshynyń moraldyq jaǵdaıyna keri áserin tıgizip, onyń jeke múliktik emes quqyqtaryn buzǵanyn eskere otyryp, talap qoıýdy ishinara qanaǵattandyrdy. Jaýapkerden qylmystyq is boıynsha keltirilgen 6 877 672 teńge materıaldyq shyǵyn men 10 mln teńge moraldyq zııan óndirildi», - delingen elorda sotynyń sheshiminde. 

Sot sheshimi zańdy kúshine engen joq.

Buǵan deıin 24 jylǵa sottalǵan eks-mınıstr Qýandyq Bıshimbaevtyń ústinen materıaldyq jáne moraldyq shyǵyndy óndirý týraly azamattyq is qozǵalǵanyn jazǵan edik. 

Aıta ketsek, burynǵy Ulttyq ekonomıka mınıstri Qýandyq Bıshimbaev jazasyn ótep jatqan mekemeden ázirge jumys tappady.