Bishkektegi terakti boıynsha izdestirilip jatqan adam lańkesterge qatysy joqtyǵyn málimdedi
«Men Múbarak Turǵanbaev Ystambulda Túrkııadan Qyrǵyzstanǵa taýar jetkizetin «Adal Týr» fırmasynda jumys isteımin. Sonymen birge, ózge fırmalar sekildi aqsha aýdarymdarymen aınalysamyn. Máselen, kimde-kim Túrkııadan Qyrǵyzstanǵa aqsha aýdarǵysy kelse, ony biz júzege asyramyz. 1 shilde kúni de dál solaı boldy. Túrkııada meıramhana bıznesimen aınalysatyn Burhan esimdi er adam Bishkektegi Eskendir degen adamǵa 5 myń dollar aýdarýdy ótindi. Uıaly telefon nómiri (0709) 66-87-40 de kórsetilgen. Bizdiń qyzmetkerler oǵan aqshany jetkizdi. Dál osy Eskendir Qyrǵyzstandaǵy Qytaı elshiligi mańyndaǵy teraktke qatysy bar dep izdestirilýde. Biraq arnaıy qyzmet Eskendirdi taba almaı jatyr. Aqshany bergen Bahredın men Mýradıl ustaldy jáne «Adal Týr» fırmasynyń qyzmetkerinen aqsha alǵanyn aıtyp, túsinikteme berdi».
«Meniń bul teraktige esh qatysym joq. Maǵan jala jabyldy, izdeý jarııalandy, biraq eshkim tergeýge shaqyrǵan joq. Men eshqaıda qashqan joqpyn, Ystambuldaǵy Qyrǵyzstan elshiligimen tyǵyz baılanysta jumys isteımin. Meniń lańkestermen eshqashan baılanysym bolǵan emes. Muny Túrkııada meni tanıtyn jannyń barlyǵy rastaı alady. Eshqandaı sot bolǵan joq, tergeýge eshkim shaqyrǵan joq, al olar maǵan halyqaralyq izdeý jarııalady. Bizge aqsha jetkizgen tulǵalar bul habarlamany kórip, qashyp ketýi múmkin. Sonymen birge, Qyrǵyzstandaǵy «Adal Týr» fırmasynyń qyzmetkerleri ustaldy. Men ádildik úshin sońyna deıin kúresemin, eshqaıda qashqan emespin jáne qashýǵa tyryspaımyn da», - dep jazdy M.Turǵanbaev óziniń paraqshasyna.
Aıta keteıik, 6 qyrkúıek kúni QR MUQK Bishkektegi Qytaı elshiligi mańyndaǵy lańkestikke qatysy bar dep kúdiktelgen tulǵalardyń aty-jónin jarııalady. Arnaıy qyzmet úsh kúdiktige halyqaralyq izdeý jarııalady, onyń arasynda Túrkııadaǵy «Adal Týr» fırmasynyń ókili, 1987 jyly týǵan, Osh oblysy, Nookat aýdanynyń týmasy M.Turǵanbaev ta bar.
