Bishkektegi tártipsizdikter kezinde bir adam qaza taýyp, 590 adam zardap shekti
BІShKEK. KABAR – QazAqparat – 6 qazan kúngi saǵat 08:00-degi jedel málimet boıynsha, densaýlyq saqtaý uıymdaryna qaladaǵy tártipsizdikterden zardap shekken 590 adam kelgen.
Olardyń arasynda 439 adam alǵashqy medıtsınalyq kómek kórsetilgen soń, ambýlatorlyq em alýǵa jiberildi.
Zardap shekken 150 adam túrli jaraqattarmen aýrýhanaǵa jatqyzyldy, sonyń ishinde 13 adam jansaqtaý bóliminde jatyr. Bul týraly QazAqparat Qyrǵyzstannyń KABAR agenttigine silteme jasap habarlaıdy.
Qyrǵyz respýblıkasynyń densaýlyq saqtaý mınıstrliginiń málimetterinshe, Bishkektegi travmatologııa jáne ortopedııa ǵylymı-zertteý ortalyǵyna zardap shekken 288 adam kelip túsken, sonyń ishinde 69 adam aýrýhanaǵa jatqyzyldy. Zardap shekken 5 adam jansaqtaý bóliminde jatyr.
Ulttyq gospıtalge zardap shekken 164 adam jetkizildi, sonyń ishinde 58 adam aýrýhanaǵa jatqyzylǵan. 6 adam jansaqtaý bóliminde jatyr, bir adam qaıtys boldy (belgisiz er adam, azııalyq ult).
#1 qalalyq klınıkalyq aýrýhanaǵa zardap shekken 30 adam jetkizilgen, sonyń ishinde 23 adam ambýlatorlyq em alýǵa jiberildi. 7 adam aýrýhanaǵa jetkizilgen, sonyń ishinde bireýi jansaqtaý bóliminde jatyr.
Shý oblystyq aýrýhanasyna 93 adam kelip túsken, 90 adam ambýlatorlyq em alýǵa jiberildi. Úsheýi aýrýhanaǵa jatqyzylǵan, bir adam jansaqtaý bóliminde jatyr.
Ulttyq hırýrgııa ortalyǵyna 15 adam kelip túsken, sonyń ishinde ekeýi ambýlatorlyq em alýǵa jiberildi, 13 adam aýrýhanaǵa jatqyzyldy.
