Bishkektegi mıtıng: 122 adam aýrýhanaǵa tústi
BІShKEK. QazAqparat – Bishkekte jergilikti saǵat 24.00-degi jaǵdaı boıynsha mıtıngige qatysýshylardy tarqatý barysynda 122 adam zardap shegip, aýrýhanaǵa jetkizildi, dep habarlaıdy QazAqparat Kabar agenttigine silteme jasap.
Eldiń Densaýlyq saqtaý mınıstrliginiń málimetinshe, Bishkektiń Travmatologııa jáne ortopedııa ǵylymı-zertteý ortalyǵyna barlyǵy 65 adam tústi. Olardyń ishinde 40 adam – kúsh qurylymdarynyń qyzmetkerleri. 2 zardap shegýshi synyq jaraqattarmen jansaqtaý bólimine jatqyzyldy. Dárigerler jaǵdaılaryn aýyr dep baǵalaýda.
Ulttyq gospıtalǵa 40 adam jetkizildi, onyń ekeýi – jansaqtaý bóliminde.
№1 Qalalyq klınıkalyq aýrýhanaǵa 2 adam jatqyzylǵan.
Shý oblystyq aýrýhanasyna 7 zardap shegýshi júgingen. Alǵashqy medıtsınalyq kómekten keıin olar ambýlatorlyq em qabyldaý úshin úılerine jiberildi.
Ulttyq hırýrgııa ortalyǵyna 7 adam túsken. Onyń ishinde bireýi emin ambýlatorlyq jaǵdaıda qabyldaıtyn bolady.
Qaza bolǵandar joq.
Sondaı-aq Densaýlyq saqtaý mınıstrliginiń aqparatyna sáıkes, Bishkek qalalyq Shuǵyl kómek ortalyǵynyń feldsherine shabýyl jasalǵan. Ol aýrýhanaǵa jatqyldy. Jedel járdem brıgadasynyń eki kóligi zaqymdalǵan.
Eske salaıyq, jeksenbi, 4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.
Al, búgin, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
Keıin Qyrǵyzstan Prezıdenti Sooronbaı Jeenbekov erteń, 6 qazan kúni parlamenttik saılaýǵa qatysqan barlyq 16 partııa basshysymen kezdesetini málim etildi.
Aıta keteıik, eldiń Ortalyq saılaý komıssııasy daýys berýdiń sońǵy nátıjesin saılaýdan keıin 20 kúnnen keshiktirmeı jarııalaýy tıis.
