Bishkektegi meıramhanadan tamaqtanǵandar jappaı ýlandy
ASTANA. QazAqparat - Bishkektegi meıramhanalardyń birinde klıentter tamaqtan jappaı ýlanyp qaldy. Bul jaıly Qyrǵyzstan Densaýlyq saqtaý mınıstrliginiń baspasóz qyzmetine silteme jasap Kabar agenttigi habarlaıdy.
2018 jylǵy 1 sáýirde ýlaný saldarynan Respýblıkalyq klınıkalyq juqpaly aýrýlar aýrýhanasyna kelgender sany 38-ge jetti, sonyń jeteýi balalar. Zardap shekkenderdiń jaǵdaıy turaqty, ómirine qaýip tónip turǵan joq, tıisti em-dom jasaldy.
Memlekettik sanıtarlyq-epıdemıologııalyq qadaǵalaý ortalyǵy tekseris júrgizip jatyr. Aldyn ala málimetter boıynsha, meıramhanaǵa respýblıkanyń túrli óńirlerinen kelgen adamdardyń sany 190-nyń tóńireginde.
Zardap shegýshilerden synamalar alynyp, saraptamaǵa jiberilgen, onyń qorytyndysy úsh kúnniń ishinde shyǵýy tıis.
