Bishkektegi meıramhanadan 249 adamnyń ýlaný sebebi anyqtaldy
ASTANA. QazAqparat - Bishkektegi «Ala-Too» meıramhanasynda ótken toıdan keıin 249 adamnyń ýlanýyna taýyq eti sebep bolǵan, dep habarlaıdy Kabar.
Bishkek memlekettik sanıtarlyq-epıdemıologııalyq qadaǵalaý ortalyǵy júrgizgen saraptamada taı retseptimen pisirlgen taýyq etiniń quramynan salmonella bakterııalary tabylǵan.
«Salmonella bakterııalary daıyn ónimnen alynǵan synamalardyń quramynda bar da, tamaqty pisirýge qoldanylǵan shıkizatta joq. Osydan taǵamdy ázirleý tehnologııasy jáne saqtaý sharttary buzylǵan degen qorytyndyǵa kelýge bolady», - dep málimdegen Qyrǵyz Respýblıkasy Densaýlyq saqtaý mınıstrliginiń baspasóz qyzmeti.
Bishkek memlekettik sanıtarlyq-epıdemıologııalyq qadaǵalaý ortalyǵy jappaı ýlanýdyń saldaryn joıý jumystaryn júrgizýde, soǵan baılanysty «Ala-Too» meıramhanasy dezınfektsııalanyp jatyr.
Qazir Respýblıkalyq juqpaly aýrýlar aýrýhanasynda 94 adam, Shý, Naryn jáne Ystyqkól oblystarynda taǵy 36 adam emdelip jatyr.
Jappaı ýlanýdan Bishkektiń 204 turǵyny jáne basqa óńirlerden kelgen 45 adam zardap shekken.
Jappaı ýlaný deregi boıynsha Qyrǵyz Respýblıkasy Qylmystyq kodeksiniń 256-baby (sanıtarlyq-epıdemıologııalyq erejelerdiń buzylýy) jáne 258-baby (qaýipsizdik talaptaryna saı emes taýarlardy satý nemese óndirý, qyzmet kórsetý) boıynsha qylmystyq is qozǵalyp, tergep-tekserý bastalǵan.
Buǵan deıin «Ala-Too» meıramhanasyna 20 myń som aıyppul salynyp, ýlanýdyń mán-jaıy anyqtalǵanǵa deıin jabylǵany, sondaı-aq meıramhana ákimshisine 5 myń som aıyppul salynǵany týraly habarlanǵan bolatyn.
Foto: kabar.kg
