Bishkektegi qazaqstandyq balalar áskerı ushaqpen elge oraldy

ATYRAÝ. QazAqparat – 24 naýryz jergilikti ýaqytpen saǵat 7.00-de Atyraýǵa Bishkekten áskerı ushaq kelip qondy. Ushaq bortynda 21 jolaýshy boldy. Onyń 11-i – ana, al, 10-y - tserebraldy sal aýrýymen aýyratyn balalar, dep habarlaıdy QazAqparat QR Qorǵanys mınıstrligine silteme jasap.

Olar Qyrǵyzstanda eki apta em alǵan. Biraq, áýe reısi toqtatylyp, elge qaıta almaı qalǵan.

«Balalardy tasymaldaý úshin aıryqsha jaǵdaı qajettilik týyndady. Sondyqtan, bul iske QR Qorǵanys mınıstrliginiń avıatsııasy tartyldy» -dep málim etti QR QM Qyrǵyzstandaǵy áskerı attashesi, polkovnık Ahtan Ábildaev.

Elge oralǵandardan arnaıy aımaqta koronavırýsqa jedel test alyndy. Test qorytyndysy 7-8 saǵat ishinde belgili bolady. Eger test teris nátıje kórsetse, atalǵan ushaq jolaýshylary úıine jiberiledi.

«Bishkek áýejaıynda da jan-jaqty tekserýden óttik. Dene qyzýymyzdy ólshep, ózimizdiń de, balalardyń da jaǵdaıyn qarady. Qaýipti derttiń belgisi baıqalǵan joq. Bul test te teris nátıje kórsetip, úıimizge baratynymyzǵa senemiz» - deıdi erekshe balanyń anasy Venera Ádilova.

Arnaıy aımaq tamaq, gıgıenalyq quraldarmen, kıimdermen qamtylǵan. Bul shara koronavırýstyń taralmaýyna baǵyttaldy.

«Bishkekten kelgen 11 ana men 10 balaǵa Atyraý oblystyq ákimdigi tarapynan barlyq qajetti qoldaý kórsetiledi. Osy maqsatta oblys ákimdigi janynan arnaıy komıssııa qurylyp, jolaýshylar jan-jaqty baqylaýǵa alyndy» -dedi Atyraý oblysy ákiminiń orynbasary, arnaıy komıssııa tóraǵasy Baqytgúl Hamenova.

Eske sala keteıik, buǵan deıin sal aýrýyna shaldyqqan balalar men olardyń analary Qyrǵyzstannan elge qaıta almaı qalǵanyn jazǵan bolatynbyz.