Bishkektegi búlik basylar emes: qorqaýlar úılerdi órteýde
ASTANA. Sáýirdiń 20-sy. QazAqparat - Qyrǵyzstandaǵy jaǵdaı qaıta ýshyǵyp otyr. Bishkek túbindegi Maevka selosynda qala shetinen jer telimin alǵysy keletin qyrǵyzdar men osy mańda burynnan turyp kele jatqan jáne aýdandaǵy jerdiń basym bóligine ıelik etetin túrikterdiń arasynda ultshyldyq qaqtyǵystar oryn alýda,
dep habarlaıdy RBK agenttigi.
Óz betterimen jer basyp alýshylardyń bir toby keshe Maevka jáne Lenınskoe selolary turǵyndarynyń jer telimderine basa-kóktep kirip, qazyq qadaı bastady. Jer ıeleri olardy qýyp shyqpaq bolǵan kezde joǵaryda aıtyp ótken qaqtyǵystar oryn alǵan.
Qandary qyzyp alǵan buzaqylar aldymen mılıtsııa ǵımaratyn shabýyldaǵan, odan keıin Bishkekke bet alǵan. Taspen jáne armatýramen qarýlanǵan jastar qala ortalyǵyna Úkimet úıine ótpek bolǵan, biraq olardy quqyq qorǵaý organdarynyń qyzmetkerleri toqtatqan.
Olardyń aldyna shyqqan Bishkek meriniń mindetin atqarýshy Isa Omarqulov qalanyń shetki aýdandarynan olarǵa jer berýge ýáde berdi. Sodan keıin álgiler seloǵa qaıta oralady, biraq bul kezde jergilikti turǵyndar qorǵanýǵa ázir bolady, olardyń ishinde ańshy myltyǵymen qarýlanǵandar bolǵan.
Kýágerlerdiń habarlaýynsha, elirgen tobyr ondaǵan úıdi órtep jibergen. Aldyn-ala málimetter boıynsha, oqıǵa saldarynan 2 adam qaza bolǵan, 10-nan astam adam jaralanǵan.
Ýaqytsha úkimettiń basshysy Roza Otynbaevanyń aıtýynsha, qazir atalǵan selodaǵy jaǵdaı «baqylaýǵa alyndy». Quqyq qorǵaýshylar men olarǵa kómekke kelgen aýyl turǵyndarynyń kúshimen tártip retke keltirildi. Quqyq qorǵaý organdaryndaǵy derekkózdiń málimeti boıynsha, 40-qa jýyq adam qamaýǵa alynǵan.
