Bishkekte jarylys boldy, qaýipsizdik sharalary kúsheıtildi
BІShKEK. 30 qarasha. QazAqparat /Arnur Rahymbekov/ - Búgin tańerteń saǵat 8.55-te Bishkekte, «sáýir oqıǵalary boıynsha» sot isi júrip jatqan Qojamqul atyndaǵy Sport saraıynyń mańynda jarylys boldy.
Aldyn ala málimetter boıynsha, káriz qudyǵyna qoıylǵan qoldan jasalǵan jarylǵysh zat iske qosylǵan. Jarylystyń saldarynan dıametri 7-10 metrlik shuńqyr paıda boldy. Qyrǵyzstan Іshki ister mınıstrliginiń eki áskerı qyzmeti zardap shekken.
Qazirgi ýaqytta Qyrǵyzstanda barlyq strategııalyq jáne erekshe mańyzdy nysandardyń kúzetteri kúsheıtildi. El basshylyǵy barlyq kúsh-qýat vedomstvolarynyń basshylaryna osyndaı ókim berdi.
Eldiń Іshki ister mınıstrligine erekshe mańyzdy nysandardyń kúzetin kúsheıtý, qoǵamdyq-saıası jaǵdaıdy turaqtandyrý, qoǵamdyq qaýipsizdikti qamtamasyz etý josparlaryn júzege asyrý mindettelip otyr.
Osh merııasynan kelip túsken aqpar boıynsha, «jaǵdaıdyń kúrdelenýine baılanysty jáne azamattardyń qaýipsizdigin qamtamasyz etý, lańkestik áreketter men basqa da qoǵamǵa qarsy qubylystarǵa jol bermeý maqsatynda qalanyń mádenı-aǵartý mekemelerinde, oqý oryndarynda mádenı-buqaralyq sharalar ótkizýge ýaqytsha tyıym salynyp otyr».
Memlekettik mekemelerdiń, mınıstrlikter men vedomstvolardyń basshylaryna táýlik boıy kezekshilikter uıymdastyrýǵa keńes berildi. Qarý-jaraqtardyń, oq-dárilerdiń, jarylǵysh, pırotehnıkalyq jáne asa ýytty ýly zattardyń ákeliný joldary qatań baqylaýǵa alynyp otyr. Sondaı-aq áýejaılar men avtovokzaldarda tekserý júrgizý, sheteldik azamattardyń tólqujat-vızalyq rejimderin tekserý sharalary kúsheıtilýde.
