Bishkekte urylar úsh áıeldi tepkiniń astyna alǵan sát kameraǵa túsip qalǵan
ASTANA. QazAqparat - Bishkektegi dúkenderdiń birinde belgisiz bireýler úsh áıeldi aıaýsyz uryp, tonap ketti. Shabýyl sáti beınebaqylaý kameralaryna túsip qalǵan, dep habarlaıdy Qyrǵyzstannyń Sputnik agenttigi.
Zardap shekken áıelderdiń biriniń tanysy oqıǵanyń 2016 jyldyń 22 jeltoqsan kúni keshqurym oryn alǵanyn aıtqan. Onyń aıtýynsha, áıel saýda túsimin alýǵa kelgende, dúkenge belgisiz úsh adam kiredi. Qaskúnemder úsh áıelge shabýyl jasap, 40 myń somdy alyp ketedi.
Quqyq qorǵaý organdary qylmyskerlerdi taba almaǵan. «Aryzdy sol kúni keshkisin saǵat 23:00 shamasynda jazdyq. Mılıtsıonerler kelip, staqandardy jınady. Biraq, saýsaq izderin almady, olardyń anyq emes ekendigin aıtty. Alaıda, taspada kórinip turǵandaı, olar iztańbalar alýǵa bolatyndaı kóp zattardy ustaǵan edi. Qaskúnemderdi sol qalpy tappady, bir aı boıy ótirik ýáde berip, aldap keldi», - dep málimdedi er kisi.
Onyń aıtýynsha, úsh áıeldiń tek bireýi qatty jaraqat alǵan. «Olardyń barlyǵynyń jaǵdaıy qazir jaqsy. Tepkiniń astynda qalǵan áıel soqqydan jaqsy qorǵanǵan - onyń denesinde tek jaralar qaldy. Al, taǵy bir áıeldi kók ala qoıdaı etip sabaǵan, onyń beti kógerip ketken», - dep habarlady zardap shegýshiniń tanysy.
Agenttik Shý oblystyq ІІB-men baılanysqan. Basqarmada habarlanǵandaı, Alamedi AІІB-da Qyrǵyzstan Respýblıkasy Qylmystyq kodeksiniń 168-baby «Tonaý» boıynsha qylmystyq is qozǵaldy. Biraq qylmyskerler áli anyqtalmaǵan, izdestirý jumystary júrgizilýde.
