Bishkekte uly jazýshy Shyńǵys Aıtmatovtyń mereıtoıy atap ótildi

ASTANA. QazAqparat - Bishkekte Shyńǵys Aıtmatov eskertkishiniń janynda qyrǵyz halyq jazýshysy Shyńǵys Aıtmatovtyń týǵan kúnine arnalǵan eske alý keshi uıymdastyryldy.

 Bul týraly Bishkek qalasy meriniń baspasóz qyzmeti habarlady, dep jazady KırTAG.

Іs-sharany Qyrǵyzstan Respblıkasynyń tarıhy men mádenıeti jyly aıasynda Sh.Aıtmatov atyndaǵy №1 kitaphana uıymdastyrǵan.

«Sh.Aıtmatov atyndaǵy orys drama teatrynyń akterleri uly jazýshy men onyń shyǵarmashylyǵyn eske ala otyryp, «Ana alańy» povesinen monolog daıyndady. Bishkektegi bilim ordalarynyń stýdentteri Shyńǵys Tóreqululyna arnalǵan óleń shýmaqtaryn oqydy. Barlyq turǵyndar men qonaqtarǵa arnalyp túrli jyldar men janrlardaǵy shyǵarmalar kórsetilgen «Álemge teń ómir» kitap kórmesin qalalyq kitaphana uıymdastyrdy», - dep aıtylady habarlamada.

Eske sala keteıik, Shyńǵys Aıtmatov 1928 jyly jeltoqsannyń 12-si Sheker, Qyrǵyz AKSR dúnıege kelgen oıshyl gýmanıst, danagóı, qazaq-qyrǵyzǵa ortaq halyq jazýshysy, Sotsıalıstik Eńbek Eri, KSRO memlekettik syılyǵynyń úsh márte ıegeri jáne Lenındik syılyqtyń laýreaty.

Qyrǵyz aýyl sharýashylyǵy ınstıtýtyn bitirgen soń (1953) Qazaqstannyń Jambyl oblysynda zootehnık bolyp qyzmet atqarǵan.1956-1958 jyldary Máskeýdegi Joǵarǵy ádebıet kýrsynda tyńdaýshy, 1959-1960 jyldary "Lıteratýrnyı Kırgızstan" jýrnalynyń redaktory, 1960-1965 jyldary "Pravda" gazetiniń Qyrǵyzstandaǵy menshikti tilshisi, 1965-1986 jyldary Qyrǵyzstan Kınematografıster odaǵynyń tóraǵasy, 1986 jyly Qyrǵyzstan Jazýshylar odaǵy basqarmasynyń tóraǵasy, 1988 jyly "Inostrannaıa lıteratýra" jýrnalynyń Bas redaktory, 1990 jyly KSRO-nyń Lıýksembýrgtegi elshisi boldy. 1991 jyldan Qyrǵyzstannyń Belgııadaǵy tótenshe jáne ókiletti elshisi qyzmetterin atqardy. "Áshim" atty tuńǵysh áńgimesi 1952 jyly jarııalandy. Onan keıin "Aspaly kópir" (1956), "Betpe bet" (1957) taǵy basqa áńgimeleri jaryq kórdi. Jazýshyny alǵash álemge tanytqan tańdaýly týyndysy áıgili "Jámıla" povesi (1958). 

Eske sala keteıik, Shyńǵys Aıtmatov 2008 jyly maýsymnyń 10-ynda Almanııanyń Nıýrnberg qalasyndaǵy aýrýhanada em alyp jatqanda qaıtys boldy. 14 maýsymda Bishkek qalasynyń shetindegi «Ata-Beııt» tarıhı-memorıaldyq kesheninde jerlengen.