Bishkekte TÚRKSOI uıymynyń 25 jyldyǵyna arnalǵan kontsert ótti

ASTANA. QazAqparat - Qyrǵyzstannyń astanasynda TÚRKSOI uıymynyń 25 jyldyǵyna arnalǵan «Meniń dostarym - meniń baılyǵym» atty kontsert ótti, dep habarlaıdy Kabar.

Kontsertke túrki áleminiń tórt buryshynan jınalǵan 70-ten astam ónerpaz qatysty.

Kontserttiń ashylýynda sóz sóılegen Qyrǵyzstan vıtse-premeri Cholpon Sultanbekova túrki áleminiń mádenıeti men ónerin damytýǵa qosyp jatqan úlesi úshin TÚRKSOI uıymyna alǵysyn bildirdi.

Uıymnyń Bas hatshysy Dúısen Qaseıinov túrki áleminiń baı mádenı murasy saqtap kelesi býynǵa tabystaý TÚRKSOI uıymynyń basta maqsaty ekendigin, 25 jyldyq mereıtoı túrki elderiniń bárinde atalyp ótiletinin tilge tıek etti.

Professor Muratbek Begalıev negizin quraǵan Bishkek Sımfonııalyq orkestriniń oryndaýyndaǵy klassıkalyq týyndylarmen qatar, kontsertte túrki memleketteriniń kameralyq orkestrleri de óner kórsetti.

Sahnada Ýzeır Gadjıbekovtyń «Keroǵly», Muqan Tólebaevtyń «Birjan men Sara» operalary, sonymen birge Qazaqstan, Ázerbaıjan, Qyrǵyzstan, Túrkııa, Ózbekstan, Bashqurtstan (RF) jáne Tatarstan (RF) jas oryndaýshylary óner kórsetti.

«Meniń dostarym - meniń baılyǵym» kontserti TÚRKSOI uıymnyń Bas hatshysy Dúısen Qaseıinov skrıpkamen oryndaǵan Klod Fransýanyń «My way» kompozıtsııasymen aıaqtaldy.