Bishkekte prezıdent Q.Bakıevtiń úıi tonaldy jáne órtep jiberildi
ASTANA. Sáýirdiń 8-i. QazAqparat - Bishkekte belgisiz bireýler Qyrǵyzstan prezıdenti Qurmanbek Bakıevtiń otbasyna tıesili úılerdi tonap, órtep jiberdi, dep habarlady RBK agenttigi.
Birneshe jas jigittiń Jibek Joly dańǵylynda ornalasqan úıden uzaq ýaqyt boıy dúnıe-múlik tasyǵany, keıinnen ol úılerden órt shyqqany habarlanyp otyr. Beıresmı aqparattar boıynsha, sońǵy kezde bul úılerde prezıdenttiń jaqyn týystary turyp kelgen. Buǵan deıingi aqparattarda, Q.Bakıev pen el qorǵanys mınıstri Baqytbek Qalyevtyń Osh qalasyndaǵy ońtústik rezıdentsııaǵa aýysqany habarlanǵan bolatyn.
Aıta keteıik, Bishkekte tonaý faktileri jalǵasýda. Qyrǵyzstan ókimeti men oppozıtsııa ókilderiniń arasyndaǵy sońǵy kelissóz nátıjesiz aıaqtalǵannan keıin, narazylyq bildirýshiler úkimet ǵımaratyna basyp kirip, búlik uıymdastyrdy. Sondaı-aq, oppozıtsııashylardyń Bishkektegi Kórkemsýret óneri murajaıyn tonaǵany habarlandy.
Sońǵy málimetter boıynsha, oppozıtsııanyń jappaı narazylyq aktsııalarynyń nátıjesinde Bishkekte 47 adam qaza boldy, júzdegen adam jaraqat aldy. Qyrǵyzstan ókimeti qazaq tarabynyń ótinishi boıynsha Qazaqstanmen aradaǵy memlekettik shekarany japty.
