Bishkekte mıtıngte jaraqat alǵan 5 adam aýrýhanaǵa jetkizildi
BІShKEK. QazAqparat - Bishkektiń Ala-Too alańyndaǵy mıtıngte zardap shekken bes adam ulttyq gospıtalge jetkizildi, dep habarlaıdy QazAqparat Kabar agenttigine silteme jasap.
Bul jaıly Qyrǵyzstannyń densaýlyq saqtaý mınıstrligi resmı málimet taratqan.
Jaraqattanǵandardyń ekeýi ambýlatorlyq kómek alǵan, al úsheýi ortasha aýyr jaǵdaıda gospıtalge jatqyzylǵan.
Mınıstrliktiń málimetinshe, «Ata Meken» partııasynan depýtattyqqa kandıdat Tilek Toqtoǵazıev te ortasha aýyr jaǵdaıda aýrýhanaǵa túsken.
Aıta keteıik, Ala-Too alańynda ótken mıtıngte ártúrli partııany jaqtaýshy taraptardyń arasynda qaqtyǵys bolǵan.
Bishkektegi jaǵdaı 5 qazanda parlament saılaýyna kóńili tolmaǵandar mıtıngke shyqqaly beri tynyshtalmaı otyr.
